Бешанковіцкія школьнікі ў тройцы пераможцаў рэспубліканскага конкурсу

У Нацыянальным цэнтры мастацкай творчасці дзяцей і моладзі, як даніна павагі ўсім, хто падарыў нам будучыню, праходзіла рэспубліканская выстава-конкурс дзіцячай творчасці «Салют Перамогі!», прысвечаная 75-годдзю Перамогі ў Вялікай Айчыннай вайне.

  У яе заключным этапе прыняло ўдзел больш за 650 навучэнцаў устаноў адукацыі з усіх рэгіёнаў краіны. Было прадстаўлена больш за 500 творчых прац: 230 выяўленчых, 140 прыкладных, 70 фотаздымкаў, 45 твораў і 28 анімацыйных фільмаў з больш чым 200 устаноў адукацыі.

  Прыемна, што сярод усёй гэтай разнастайнасці былі і працы нашых землякоў - вучняў 3 "Б" класа СШ №1 райцэнтра Ясеніі Аўчыннікавай і Сяргея Камовіча. У намінацыі «Мастацкая фатаграфія» (узроставая катэгорыя 8-12 гадоў) іх фотаздымкі занялі ганаровае трэцяе месца. Да гэтага іх "стварэнні" прайшлі паспяховы адбор на раённым і абласным этапах, дзе былі адзначаны дыпломамі I ступені.

    Праца вялася пад чулым кіраўніцтвам настаўніка Аксаны Анатольеўны Голубевай. Ідэйным натхняльнікам выступіла мама Ясеніі - Вікторыя Віктараўна Даўгалёва, якая, дарэчы, у фае СШ №1 аформіла фотавыставу «Дзеці вайны», прысвечаную 75-годдзю Вялікай Перамогі. У якасці мадэляў былі прыцягнутыя навучэнцы 3 "Б" класа: Ясенія Аўчыннікава, Марыя Кашаева, Дар'я Анашка, Кірыл Бабаед, Сяргей Камовіч, Марыя Шарэнда, Вікторыя Мацуганова і чатырохгадовая Міраслава Аўчыннікава.