Дэлегацыя Бешанковіцкага раёна прыняла ўдзел у абласным форуме працуючай моладзі

     Абласны форум працуючаймоладзі, які прайшоў на базе РУП "Віцебскэнерга", сабраў больш за сотню чалавек з усіх куткоў Віцебшчыны. Арганізатарамі мерапрыемства выступілі Віцебскі абласны камітэт БРСМ і галоўнае ўпраўленне ідэалагічнай работы і па справах моладзі Віцебскага аблвыканкама.

     Маладыя людзі мелі магчымасць быць пачутымі, абмеркаваць пытанні, якія іх хвалююць, падзяліцца цікавымі ідэямі, творчымі планамі. Жывыя зносіны - гэта ж заўсёды выдатна. За сяброўскай гутаркай ўдзельнікі форуму абмеркавалі шэраг важных тэм: ад кар'ерных магчымасцяў для таленавітай моладзі, развіцця валанцёрства да саветаў, як пачаць сваю справу і дамагчыся поспеху. На пытанні маладых людзей адказалі эксперты, сярод якіх быў і памочнік Прэзідэнта - інспектар па Віцебскай вобласці А. К. Ліневіч.

     У маладых людзей шырокае кола інтарэсаў, але без прыкладу і савета вопытных лідэраў заўсёды цяжка. Анатоль Канстанцінавіч падзяліўся сваёй гісторыяй поспеху, адзначыўшы, што жыццёвы шлях часам нялёгкі, не заўсёды ўсё атрымліваецца, але ніколі нельга адчайвацца, у цяжкую хвіліну варта ўспомніць фразу: хто не падаў, той не ўздымаўся. Цяжкасцю можна дамагчыся ўсяго, галоўнае - калектыў аднадумцаў побач і смелы дэвіз «Я магу, я буду!». А. К. Ліневіч нагадаў і яшчэ аб адным складнікупоспеху - заўсёды трымаць дадзенае слова.

     Здавалася, усе хвалюючыя пытанні зададзены, парады прынятыя да ведама, але для ўдзельнікаў форуму праграма толькі пачыналася. Інтэрактыўнымі пляцоўкамі акрамя спарткомплексу РУП «Віцебскэнерга» былі і такія вядучыя прадпрыемствы абласнога цэнтра, як ТАА «Кіруючая кампанія холдынгу «Беларуская гарбарна-абутковая кампанія «Марка» і ТАА «Фортэкс - водныя тэхналогіі». Прадстаўнікоў друкаваных СМІ рэгіёну чакала праца ў інтэрнэт-прасторы, знаёмства з дзейнасцю інтэрнэт-тэлебачання і газеты «Мы і час» ВДУ імя П. М. Машэрава. Майстар-класы, экскурсіі - інтэрактыўны квэст атрымаўся вельмі насычаным і цікавым. Натхняла атмасфера музеяў: факсіміле старажытных рукапісаў, працы талентаў мастацка-графічнага факультэта ...

     На падвядзенні вынікаў прысутнічаў намеснік старшыні аблвыканкама В. П. Пенін. Уладзімір Пятровіч не прамінуў пацікавіцца меркаваннем удзельнікаў дыялогу пра падобныя мерапрыемствы, а таксама пажадаў поспехаў у дасягненні будучых мэтаў. Моладзь, ужо разыходзячыся, усё яшчэ з задавальненнем дзялілася ўражаннямі, бо кожны абавязкова узяў нешта на нататку: развіваць якасці, неабходныя лідэру, пакараць новыя гарызонты, але пры гэтым - мэтанакіравана і з натхненнем ...

Марыя Санько, http://www.gztzara.by