У Бешанковічах запалілі галоўную ёлку

Імкліва падыходзіць да канца 2019 год. Часам цяжка паверыць і ўсвядоміць, што час праляцеў так хутка. Радуе хаця б, што наступіла самая чароўная пара - час навагодняй казкі і каляднага чараўніцтва. Адзін з галоўных сімвалаў снежня - навагодняя ёлка. У сераду, 18 снежня, у райцэнтры адбылося святочнае мерапрыемства "Ёлка запальвае агні».

Цырымонія запальвання пухнатай прыгажуні рэгіёну прайшла без замінкі. На цэнтральнай плошчы гарпасёлка дзяцей і дарослых сустракалі Дзед Мароз, Снягурка, Бабка-Ёжка, Собачка, Клоун і, безумоўна, сімвал будучага года - Мышка (Мікі Маус). Усе разам сваім дружным і вельмі гучным «раз, два, тры, ёлачка, гары!», як па чараўніцтве, яны ўмомант «ўключылі» тысячы агнёў. Затым дружна і весела вадзілі вакол яе карагоды, танцавалі, пляскалі, тупалі.

У Новы год прынята загадваць жаданні. Цуды, як абяцаюць Дзед Мароз і Снягурка, абавязкова спраўдзяцца. І зусім хутка (да 2020-га засталося няшмат). А каб чакаў весялей, работнікі культуры падрыхтавалі насычаную забаўляльную праграму. Чараду навагодніх мерапрыемстваў адкрые калядны канцэрт «Навагодні серпантын», які запланаваны на 24 снежня. З 25 па 30 снежня пройдуць спектаклі для дзяцей «Мышыная валтузня або Дзед Мароз у мікравалноўцы», ранішнік «Цудоўная гісторыя».

30 снежня Дзед Мароз будзе віншаваць па хатах «Казка ў кожны дом". Для юных прыдзвінцаў кожную пятніцу будзе праходзіць дыскатэка «Танцавальны перапалох» (пачатак а 18-й гадзіне). На 24, 27, 28, 29 і 30 снежня запланаваны выставы-кірмашы навагодняй прадукцыі, ёлачных цацак «Марозная гісторыя». 1 студзеня ў гадзіну ночы на цэнтральнай плошчы чакае ўсіх тэатралізаваная канцэртная праграма «Сенсацыя Новага года». 7 студзеня адбудзецца калядны канцэрт, 13 студзеня - «Калядкі прынеслі Святкі».

З такой разнастайнай праграмай можна быць упэўненым, што землякам будзе складана ўседзець дома ў гэтыя святочныя дні.

"Зара"