У Бешанковіцкім раёне стартавалі мерапрыемствы па прыпісцы да прызыўнога ўчастка

Многія хлапчукі з дзяцінства мараць служыць у войску. Менавіта яно робіць з юнака сапраўднага мужчыну, загартоўвае характар, фарміруе дух. Таму так важна не разбурыць, а ўмацаваць жаданне і імкненне хлопцаў стаць абаронцамі Айчыны. Першы важны этап у станаўленні грамадзяніна і патрыёта, які гатовы да выканання воінскага абавязку, - гэта дасягненне прызыўнога ўзросту.

У адпаведнасці з Законам Рэспублікі Беларусь «Аб вайсковым абавязку і вайсковай службе», у год выканання 16-годдзя ўсе грамадзяне мужчынскага полу нашай краіны падлягаюць прыпісцы да прызыўнога ўчастка, якая ажыццяўляецца па месцы рэгістрацыі. У студзені прыдзвінскія юнакі 2004 года нараджэння пачалі праходзіць мерапрыемствы па прыпісцы. Яна ажыццяўляецца ў мэтах пастаноўкі грамадзян на воінскі ўлік, вызначэння катэгорыi іх прыдатнасці да армейскай службы. Сёння прыпісцы падлягаюць 68 юнакоў.

Мы наведалі ваенны камісарыят, калі дадзеную працэдуру праходзілі 26 хлопцаў з СШ №1 райцэнтра, Бачэйкаўскай, Астровенскай і Ржаўскай школ. Для пачатку з кожным хлопцам супрацоўнікі ваенкамата правялі асабістую гутарку, затым пачаўся медыцынскі агляд хірургам, тэрапеўтам, неўролагам, псіхіятрам, акулістам, оталарынголагам, стаматолагам ...

Важным момантам сустрэчы з'яўляецца знаёмства будучых абаронцаў Айчыны з Законам «Аб вайсковым абавязку і вайсковай службе». Пра яго юнакам падрабязна распавёў начальнік групы прызыву на ваенную службу ваеннага камісарыята Бешанковіцкага і Шумілінскага раёнаў А.А.Бародзій.

- Сапраўдны патрыёт сваёй краіны павінен не проста любіць Радзіму, але і быць заўсёды гатовым абараніць яе ў цяжкі момант. Бо няма на зямлі больш ганаровай справы, чым абарона свайго роднага краю, - адзначыў ваенны камісар Бешанковіцкага і Шумілінскага раёнаў А.М.Савіч.