Жыхары Бешанковіцкага раёна адсвяткавалі Вадохрышча

У нядзелю, 19 студзеня, Праваслаўная Царква адзначыла адно з самых вялікіх святаў - Вадохрышча. Традыцыйна ў Свята-Ільінскай царкве была адслужаная Боская літургія, падчас якой протаіерэй Віталь Кісель асвяціў ваду. Сотні вернікаў прыйшлі ў гэты дзень памаліцца і ўзяць дадому асвечанай вады, якая па даўнім паданні лечыць ад шматлікіх хвароб, надае бадзёрасць, абараняе ад сурокаў і злых духаў. Лічыцца, што такая вада захоўвае свае цудадзейныя ўласцівасці на працягу доўгага часу.

А яшчэ гэтае свята суправаджаецца масавымі купаннямі ў палонцы. У гэтым годзе з надвор'ем пашанцавала, і многія толькі ўспаміналі знакамітыя вадохрышчанскія маразы. Нават адсутнасць лёду на вадаёме «Чыстыя пруды» ў гэтым годзе не змагла парушыць традыцыю абмывання. Тут для вернікаў абсталявалі пляцоўку з падыходам і спускам да вады. Бяспеку людзей забяспечвалі медыцынскія работнікі і ратавальнікі, а таксама прадстаўнікі РАУС і ТВВОД. Для зручнасці гараджан былі ўсталяваныя палаткі для пераапранання, вешалкі для адзення і лаўкі. Святочны настрой стварала вясёлая музыка. Пасля акунання ў купелі землякі маглі сагрэцца гарачай гарбатай.

Штогод колькасць жадаючых акунуцца ў імправізаваны Іардан узрастае. Купаюцца не толькі дарослыя, але і дзеці. Напрыклад, самым маленькім стаў пяцігадовы жыхар райцэнтра Ягор. Прыціскаючыся да мамы, малыш адважнымі крокамі ішоў у ваду і, акунуўшыся пакладзеных тры разы, борзда пабег на бераг да сваіх родных.

Тыя, хто акунуўся ў ваду, як адзін, сцвярджалі, што быццам зноўку нарадзіліся. Многія да гэтай падзеі рыхтаваліся загадзя. Рашуча да спуску ў ваду ішла яшчэ адна наша зямлячка - Анастасія. Жанчына прызналася, што дадзены абрад здзяйсняе трэці год і ў перспектыве хоча падключыць да яго ўсю сям'ю.

- Выходзячы з купелі, адчуваеш незвычайны зарад бадзёрасці і прыліў добрага настрою, - адзначыла Анастасія. - Для мяне гэта магчымасць адсекчы ўсё лішняе, пакінуць усё дрэннае ў баку і пачаць новыя справы з чыстага ліста.

"Зара"