Навіны раёна

Супрацоўнікі Дзяржаўтаінспекцыі і УП «Белтэхагляд» правялі сумесныя рэйды на дарогах Бешанковіцкага раёна, выяўляючы аўтамабілі, якія не маюць дазволу на ўдзел у дарожным руху.

Неналежны стан аўтамабіля нярэдка становіцца прычынай дарожна-транспартных здарэнняў.

- Да трагедыі могуць прывесці не толькі няспраўнасці, але і бруднае шкло, якое абмяжоўвае бачнасць, цьмянае святло запырсканых фар, зношаныя шыны, - адзначыў старшы дзяржаўтаінспектар аддзялення ДАІ РАУС У.А.Дзядзічкін. - На жаль, некаторыя кіроўцы легкадумна ставяцца да праходжання тэхагляду, лічачы яго не больш чым фармальнасцю. Аднак далёка не ўсе аўтааматары могуць самастойна выявіць тую ці іншую няспраўнасць, якая ў крытычнай сітуацыі можа стаць фатальнай, прычым не толькі для вадзіцеля, але і для тых, хто апынецца побач. Своечасовае праходжанне тэхагляду - неабходная мера, якая павышае бяспеку ўдзельнікаў дарожнага руху.

За час правядзення рэйдавых мерапрыемстваў выяўлены 51 факт эксплуатацыі транспартных сродкаў, якія не прайшлі тэхагляд. З пачатку ж года такіх зарэгістравана 842. З агульнай колькасці парушэнняў 371 было здзейснена паўторна.

Часцей за ўсё кіроўцы-парушальнікі тлумачаць адсутнасць дазвольнай наклейкі на аўтамабілі занятасцю і тым, што транспартны сродак не эксплуатуецца:

- Разумееце, машына доўга стаяла, ніхто ёю не карыстаўся, таму праходзіць тэхагляд не было ніякай патрэбы. А сёння мне спатрэбілася тэрмінова ехаць, і я вырашыў, што нічога страшнага, калі адзін раз скарыстаюся аўтамабілем, - паўтараў адзін з парушальнікаў ПДР, якога затрымалі падчас рэйду.

Варта адзначыць, што большасць кіроўцаў ўсё ж адказна ставяцца да праходжання тэхагляду. Напрыклад, у гаспадара «Оpel», якога супрацоўнікі ДАІ спынілі для праверкі дакументаў, аўтамабіль быў у поўным парадку.

- Заўсёды праходжу тэхагляд своечасова, гэта для маёй жа бяспекі, - сказаў мужчына.

Таго ж меркавання прытрымліваецца і кіроўца «Volkswagen»:

- Аўтамабіль з'яўляецца крыніцай павышанай небяспекі, няспраўны аўтамабіль - тым больш. Купляючы машыну, кожны кіроўца павінен разумець, што бярэ на сябе вялікую адказнасць і павінен сачыць за яго станам.

Ну, а для безадказных кіроўцаў КаАП Рэспублікі Беларусь прадугледжвае матэрыяльныя меры ўздзеяння: аўтаўладальнікі, якія кіруюць транспартнымі сродкамі, своечасова не прайшлі тэхагляд, прыцягваюцца да адказнасці ў выглядзе штрафу ад 1 да 3 базавых велічынь. Паўторнае парушэнне на працягу года пагражае штрафам ад 2 да 5 базавых велічынь.

"Зара"