Навіны раёна

Рабіць добрыя справы, тым больш для тых, хто ў гэтым асабліва мае патрэбу, даўно стала добрай традыцыяй для валанцёрскага руху ГА «БРСМ». Самая масавая моладзевая арганізацыя краіны на працягу некалькіх гадоў з'яўляецца ініцыятарам і арганізатарам дабрачыннай акцыі «У школу з добрым сэрцам».

Паводле слоў першага сакратара РК ГА «БРСМ» Т.А.Жукоўскай, у гэтым годзе самы актыўны ўдзел у акцыі прынялі вучні СШ №1 і №2 райцэнтра, а таксама юнакі і дзяўчаты Бачэйкаўскай сярэдняй школы.

- Штогод мы збіраем неабходныя канцылярскія прыналежнасці, прадметы адзення і ўжытку да новага навучальнага года, - распавядае Таццяна Аляксандраўна. - Пасля нашы валанцёры перадаюць сабраныя рэчы дзецям са шматдзетных, няпоўных і малазабяспечаных сем'яў. Агульнымі намаганнямі мы робім добрую справу.

У гэтым годзе, напрыклад, сабрана канцылярскіх прыладаў на суму 200 рублёў, шмат адзення (курткі, швэдры, блузкі) і мяккіх цацак. Усё гэта будзе перададзена ў Ульскі дом сямейнага тыпу, а таксама шматдзетным і малазабяспечаным сем'ям.

"Зара"