Святкаванне 900-годдзя манастыра адбудзецца 4-5 чэрвеня. Чакаецца прыезд у Полацк Свяцейшага Патрыярха Маскоўскага і ўсяе Русі Кірыла.

3 чэрвеня з 16.00 да 17.50 і 4 чэрвеня з 15.00 да 16.50 на плошчы Свабоды пройдуць мерапрыемствы праекта Полацкай епархіі і галоўнага ўпраўлення па адукацыі Віцебскага аблвыканкама «Праслаўляючы імя Еўфрасінні». Ён уяўляе сабой серыю творчых праграм. Перад гасцямі і жыхарамі горада выступяць з нумарамі на тэму духоўнасці і маральнасці, грамадзянска-патрыятычнага выхавання навучэнцы і педагогі ўстаноў адукацыі рэгіёнаў, якія ўваходзяць у структуру Полацкай епархіі.

4 чэрвеня а 13.00 у Цэнтры культуры «Полацк» заслужаны калектыў Рэспублікі Беларусь «Брэсцкі тэатр лялек» пакажа спектакль «Еўфрасінне Полацкая. Святыя літары». Спектакль створаны з выкарыстаннем гранта Прэзідэнта і прысвечаны адной з самых вядомых апякунак беларускай зямлі — прападобнай ігуменні Еўфрасінні Полацкай. У аснову пастаноўкі пакладзена жыціе манашкі, дакументальныя матэрыялы аб гісторыі Полацкага княства, народныя паданні.

Тэкст уключае таксама асобныя фрагменты пісанняў святых.

У 17.30 у Полацкім ГДК адбудзецца прэзентацыя дакументальнага фільма «Абіцель Святой Еўфрасінні». У гэты ж дзень пачынаюцца службы ў Спаса-Еўфрасіннеўскім манастыры. А 14.30 пройдзе малая вячэрня з акафістам прападобнай Еўфрасінні, а 17.00 — усяночнае трыванне.

5 чэрвеня па традыцыі ў Сафійскім саборы пройдзе набажэнства (8.30-10.40). Па яго завяршэнні — хрэсны ход у Спаса-Еўфрасіннеўскі мітрапалічы жаночы манастыр (10.40-11.30), дзе адбудзецца малебен. У гэты ж дзень у полацкай абіцелі а 10.00 сустрэнуць Найсвяцейшага Патрыярха Маскоўскага і ўсяе Русі Кірыла, пасля чаго ў Крыжаўзвіжанскім саборы пройдзе Боская літургія.

Завершыць дзень памяці канцэртная праграма «Святочны канцэрт духоўнай музыкі» вядучых прафесійных харавых калектываў Рэспублікі Беларусь.

З 3 па 6 чэрвеня а 20.05 у эфіры «Беларусь 3» будзе транслявацца 4-серыйны дакументальны фільм Белтэлерадыёкампаніі «Еўфрасіння Полацкая — святая заступніца Беларусі».

5 чэрвеня а 9.45 тэлеканал пакажа прамую трансляцыю Боскай літургіі з Крыжаўзвіжанскага сабора. А далей — стужку «Сёстры» пра гісторыю полацкай абіцелі, яе заснавальніцу Еўфрасінню Полацкую, а таксама пра сённяшні лад жыцця манастыра.

"Зара"