Дырэктар агракомплексу Аляксей Дойлін распавёў, што на плошчы 250 гектараў прыбіраюць ураджай азімай пшаніцы ўсе 12 камбайнаў, якія ёсць у гаспадарцы. Кіраўнік сказаў, што ўлічваючы карэкціроўкі, якія ўнесла дажджлівае надвор'е, рэалізуюць алгарытм, які дазваляе нагнаць страчанае.

У прыватнасці, на месцы рамантуюць тэхніку, запраўляюць камбайны палівам, на ноч пакідаюць іх проста ў полі пад надзейнай аховай.

Галоўны аграном Марыя Крупенка з гонарам паведаміла, што ўраджайнасць сёлета парадку 76 цэнтнераў з гектара, што прыкладна ў два разы (!) вышэй, чым у мінулым годзе. Сярод шасці сартоў азімай пшаніцы два айчынныя, столькі ж нямецкіх, аўстрыйскі і польскі (з прыемнай назвай «Маркіза»)

Усяго трэба сабраць збожжавыя прыкладна з 4220 гектараў. Да моманту нашага прыезду сабралі менш за 10 працэнтаў.

Паралельна рыхтуюць зямлю пад будучы пасеў азімых культур 2026 года.

Сярод удзельнікаў жніва і сямейны падрад: старэйшы камбайнер Андрэй Пруднікаў і яго сын, камбайнер Аляксандр Ерашоў. Кіраўнік упэўнены, што вопытны механізатар стане адным з першых тысячнікаў.

А 23-гадовы Ілья Еўдакімаў на сёлетняй уборачнай упершыню сеў за руль камбайна. Ён выдатна праявіў сябе ў якасці кіроўцы і трактарыста на пасеве, таму яму даверылі кіраваць «караблём палёў».

Калі мы размаўлялі з удзельнікамі ўборачнай, на поле прыехала сталовая на колах. Буфетчыца Дар'я Пісарава разлівала найсмачнейшы боршч, накладвала ў талерку пшаняную кашу і свіную катлету. І кампот з яблыкаў парадаваў хлебаробаў, якія таксама атрымалі сухпаёк на вечар. І час абедзеннага перапынку механізатары зэканомілі, таму не да застолля. Падсілкаваліся наспех і наперад на барацьбу за ўраджай, таму што выдатна разумеюць, што ўся надзея на іх і не падвядуць. Яны з гонарам паказалі надпіс на фірменнай майцы «Ніхто, акрамя нас!» -- як у дэсантнікаў. Па гэтым прынцыпе і працуюць. І яны таксама за нашу бяспеку – харчовую.

На падмозе ў аграрыяў работнікі Суражскага лясгаса Віцебскага раёна. Напрыклад, кіроўца лесанарыхтоўчай тэхнікі Андрэй Арцёменка задзейнічаны на цяперашняй уборачнай у якасці трактарыста. Сеў за руль камбайна і лесавод Юрый Бекешаў. Усяго дапамагаюць аграрыям шасцёра прадстаўнікоў лясгаса.

vitebsk-region.gov.by