Зладжаны дуэт крыміналістаў экспертнай службы раёна – эксперт Аляксандр Бабаед і старшы эксперт Вадзім Керэмша.

Сваю дзейнасць Дзяржаўны камітэт судовых экспертыз пачаў на падставе Указа Прэзідэнта Рэспублікі Беларусь ад 22 красавіка 2013 года. У адно ведамства аб'ядналі экспертныя падраздзяленні розных напрамкаў. ДКСЭ нацэлены на тое, каб максімальна поўна дапамагчы чалавеку, які звярнуўся за ўсталяваннем справядлівасці.

Судова-экспертнае забеспячэнне праваахоўных органаў, юрыдычных асоб і грамадзян на тэрыторыі нашага, а таксама Лепельскага і Чашніцкага раёнаў ажыццяўляе Лепельскі міжраённы аддзел. На варце законнасці і правапарадку – крыміналісты экспертна-крыміналістычнага сектара па Бярозкаўскім раёне Лепельскага міжраённага аддзела ДКСЭ старшы эксперт маёр юстыцыі Вадзім Керэмша і эксперт маёр юстыцыі Аляксандр Бабаед.

Вадзім Уладзіміравіч у страі амаль 12 гадоў. Яго калега – Аляксандр Леанідавіч – больш за 5 гадоў, але мае нямалы вопыт службы ў радах праваахоўнікаў. Дуэт экспертна-крыміналістычнага сектара праводзіць дактыласкапічныя, трасалагічныя экспертызы і экспертызы халоднай і метальнай зброі. З 2013 года – гэта больш за 1500 экспертыз і даследаванняў. Спецыялісты экспертнай службы раёна прынялі ўдзел у больш чым 3500 аглядах месцаў здарэнняў.

Эксперт за працай на месцы здарэння. Фотафіксацыя следу.

Праца эксперта – працэс вельмі тонкі, які патрабуе пэўных навыкаў, глыбокіх і разнастайных ведаў, досведу, самавалодання і вытрымкі, бо ніколі не ведаеш, у які час трэба будзе выехаць на месца здарэння. Крыміналістычны чамадан, з якім выбываюць на месца выкліку, днём ці ноччу, у будні, выхадныя ці святы, заўсёды нагатове.

«Правасуддзе вершыцца на фактах і доказах. Заключэнне эксперта – найважнейшая іх крыніца, вывучыўшы яго разам з іншымі доказамі, следчы прымае рашэнне – прад'яўляць абвінавачванне ці не, а суддзя – прызнаць вінаватым ці апраўдаць», – падкрэсліваюць суразмоўцы.

Ісціна дзесьці побач, і яны дапамагаюць яе адшукаць. Радасць, калі знойдзены адказ на загадку, з лішкам кампенсуе ненорміруемы працоўны дзень і шчыльны графік. Таму сваю працу, няхай яна і нялёгкая, нашы землякі не праменяюць на іншую. З святам вас, спецыялісты экспертнай службы! Моцнага здароўя, аптымізму, новых працоўных поспехаў, каб крыніца сілаў не высіхала і заўсёды трыумфавала справядлівасць!

"Зара"