Больш за 1,8 тыс. чалавек звярнуліся па меддапамогу з-за ўкусаў кляшчоў

На пачатак мая за медыцынскай дапамогай з-за ўкусаў кляшчоў звярнуліся больш за 1,8 тыс. чалавек, паведамілі БЕЛТА ў Рэспубліканскім цэнтры гігіены, эпідэміялогіі і грамадскага здароўя.

Гэта перавышае ўзровень зваротаў, зарэгістраваных за аналагічны перыяд мінулага года. Найбольшая колькасць нападаў кляшчоў адзначаецца ў лесе і сельскай мясцовасці. На долю ўкусаў у населеных пунктах прыпадае да 10-11% усіх зарэгістраваных выпадкаў.

Высокія тэмпературы паветра ў другой палове вясны вызначылі ранні пачатак сезону актыўнасці кляшчоў і звязанае з гэтым павелічэнне іх колькасці. "Па выніках энтамалагічнага маніторынгу, у лясах у красавіку гэтага года ў параўнанні з аналагічным перыядам мінулага колькасць кляшчоў узрасла да 1,5 разы. Актыўнае наведванне загарадных зон спрыяе непасрэднаму кантакту з кляшчамі ва ўмовах іх натуральнага асяроддзя пражывання і правакуе іх напад на людзей", - адзначылі ў цэнтры. Там таксама дадалі, што праводзяцца акарыцыдныя апрацоўкі тэрыторый населеных пунктаў, загарадных аздараўленчых устаноў, дзіцячых арганізацый. Па энтамалагічных паказаннях з пачатку года апрацавана больш за 150 га.

Санэпідслужба нагадвае аб мерах прафілактыкі клешчавых інфекцый. Пры выездзе на прыроду неабходна надзяваць галаўны ўбор і адзенне светлых тонаў, шчыльна прылягаючае да запясцяў і шчыкалатак, а таксама кожныя два гадзіны аглядаць сваю вопратку і адкрытыя ўчасткі цела, каб своечасова выявіць і зняць кляшчоў. Для адпужвання паразітаў рэкамендуюць выкарыстоўваць рэпеленты.

Пры выяўленні кляшча неабходна звярнуцца ў арганізацыі аховы здароўя па месцы жыхарства або знаходжання. Медыкі выдаляць яго і прызначаць прафілактычнае лячэнне.