Прэзідэнт Беларусі Аляксандр Лукашэнка сабраў нараду з кіраўніцтвам Савета Міністраў, перадае карэспандэнт БЕЛТА.

Фармат мерапрыемства традыцыйны - падобныя сустрэчы з урадам кіраўнік дзяржавы праводзіць рэгулярна.

"Перад тым як прымаць найважнейшыя рашэнні або рашэнні, якія выклікаюць асаблівае гучанне ў нашым грамадстве, мы сустракаемся з вамі для таго, каб параіцца. І для мяне важна, прымаючы рашэнні, атрымаць дадатковую інфармацыю ад ініцыятараў тых ці іншых пытанняў", - адзначыў Прэзідэнт.

У гэты раз такіх надзённых пытанняў было чатыры. Яны датычацца далейшага развіцця Беларускай чыгункі, функцыянавання магістратуры ў ВНУ, арганізацыі харчавання ва ўстановах адукацыі і падтрымкі моладзі.


"Безумоўна, чыгунка - найважнейшае прадпрыемства не толькі транспартнай галіны, але і ўсёй нашай краіны. Чыгуначным транспартам штогод перавозяцца дзясяткі мільёнаў тон грузаў. Гэта і сыравіна, імпарт, экспартныя пастаўкі нашай прадукцыі. Для людзей - самы танны і бяспечны спосаб перамяшчэння. І хоць пасажырскія перавозкі - хутчэй сацыяльны, а не камерцыйны напрамак работы, развіваць трэба абодва", - сказаў кіраўнік дзяржавы.

Ён канстатаваў, што з-за санкцый, а таксама сітуацыі ва Украіне, дзе некалькі беларускіх таварных саставаў літаральна па-пірацку былі захоплены і ўтрымліваюцца, грузапатокі давялося кардынальна трансфармаваць, шукаць новую лагістыку і ў цэлым мабілізавацца. Хоць даходы і праселі, але у цэлым перавозачная дзейнасць БЧ застаецца прыбытковай.

"Як мне дакладваюць, фінансавае становішча прадпрыемства цяпер абцяжарваюць высокія выдаткі па абслугоўванні крэдытаў, прыцягнутых пад інфраструктурныя праекты і закупку новага рухомага саставу", - адзначыў кіраўнік дзяржавы.
Каб стабілізаваць сітуацыю, падрыхтаваны праект распараджэння аб дзяржаўнай падтрымцы Беларускай чыгункі.

Аляксандр Лукашэнка пацікавіўся, як ідуць справы з улікам раней прынятых рашэнняў. "Некалькі гадоў таму мы на гэту тэму з вамі буйна пагаварылі і вызначыліся: ніякага Балонскага працэсу, у нас нармальная адукацыя", - сказаў беларускі лідар.  

Кіраўнік дзяржавы нагадаў, што раней у нейкі час з падачы асобных дзеячаў была папулярная тэма Балонскага працэсу, каб падрыхтаваць "спецыялістаў на ўсе рукі", на якіх будзе попыт за межамі краіны. "Я памятаю гэту размову. Вы што, у беларускіх універсітэтах будзеце рыхтаваць для замежжа людзей?" - спытаў ён. 

Разам з тым Аляксандр Лукашэнка звярнуў увагу на тое, што ў Беларусі вучыцца шмат замежнікаў, якія хацелі б скончыць магістратуру. "Добра, давайце так і паступім. Яны плацяць грошы за ўсё, за магістратуру. Прыходзьце, навучайцеся ў магістратуры ў тым ліку. Колькі хочаце гадоў. Вашы грошы, мы вас навучаем. Едзьце куды заўгодна працаваць", - сказаў Прэзідэнт.

Кіраўнік дзяржавы нагадаў, што пытанне навядзення парадку ў арганізацыі харчавання ва ўстановах адукацыі знаходзіцца на яго пастаянным кантролі. "Я вас неаднаразова папярэджваў: абкрадваць дзяцей, труціць іх не سەкачеснай ежай - злачынна! І даручыў тады выпрацаваць нармальную сістэму", - сказаў ён.

"Хацелася б пачуць, што зроблена ў гэтым плане", - паставіў пытанне кіраўнік дзяржавы.

Аляксандр Лукашэнка адзначыў, што часам цяжка ўявіць, што, як і хто рыхтуе ў школах, хоць чыноўнікі дакладваюць, што ўсё пад кантролем. "Ды немагчыма гэта пракантраляваць", - заўважыў Прэзідэнт. Менавіта таму і трэба было выбудаваць дакладную сістэму ў гэтым пытанні.

Іншае важнае пытанне ў гэтай сферы - наколькі запатрабавана прапанаванае харчаванне з боку саміх дзяцей. "Адыходаў палова, - абазначыў праблему кіраўнік дзяржавы. - Гэта нармальна? Што зрабілі для таго, каб гэтага не было? Як будзем карміць дзяцей, каб было смачна, карысна, каб ежа была не астылай?"

Прапанаваныя меры аб падтрымцы моладзі вынесены на абмеркаванне ў Прэзідэнта Беларусі Аляксандра Лукашэнкі на нарадзе з кіраўніцтвам Савета Міністраў. Урад унёс праект указа "Аб мерах падтрымкі моладзі", перадае карэспандэнт БЕЛТА.

Дакумент накіраваны на фарміраванне ўмоў для прыцягнення і захавання маладых кадраў на прадпрыемствах.

Аляксандр Лукашэнка заклікаў падыходзіць да гэтага пытання ўзважана. Ён адзначыў, што дапамога моладзі не павінна пераходзіць у празмерную апеку, бо сродкі дзяржаве патрэбны і на іншыя напрамкі, уключаючы развіццё вытворчай сферы і эканомікі. Акрамя таго, у маладым узросце людзі і самі цалкам здольныя працаваць і зарабляць, у адрозненне, напрыклад, ад людзей сталага ўзросту, якім з-за аб'ектыўных прычын можа быць складаней.

Прэзідэнт звярнуў увагу, што будаўніцтва жылля для ваеннаслужачых і шматдзетных сем'яў уваходзіць у лік прыярытэтаў для дзяржавы і будзе надалей заставацца пытаннем нумар адзін. І для падтрымкі шматдзетных сем'яў зараз ужо робіцца нямала, уключаючы дапамогу пры будаўніцтве жылля і выплату сямейнага капіталу. 

Аднак у частцы будаўніцтва жылля кіраўнік дзяржавы крытычна выказаўся аб месцах размяшчэння дамоў для шматдзетных. "Мы пачалі будаваць жыллё ў Мінску, у зручных месцах, сцягваючы рабочую сілу ў гарады. Што мы робім? - сказаў ён. - Мы навошта шматдзетныя сем'і сцягваем да Мінска? Яны павінны, як усе, жыць па ўсёй краіне. Раўнамернае размеркаванне працоўных рук, рабочай сілы, як гэта было ў савецкія часы".

Акрамя таго, за межамі буйных гарадоў ёсць магчымасць будаўніцтва не толькі кватэр, а дамоў з прысядзібнымі ўчасткамі, дзе можна нешта вырошчваць. "Трэба важдацца ў зямлі і нешта рабіць сваімі рукамі. Мы пра гэта забыліся, пачалі ў Мінску, абласных цэнтрах будаваць жыллё для шматдзетных", - заўважыў Аляксандр Лукашэнка. 

https://belta.by