Справа была ў Замошшы

Празмернае ўжыванне алкаголю прывяло ў чарговы раз на лаву падсудных грамадзяніна Велігуру, маладога чалавека, які атрымаў адукацыю, але не працаваў па атрыманай спецыяльнасці, які вёў бяздзейны лад жыцця, з'яўляўся апекуном бацькі-інваліда. Бацькі без рэгістрацыі пражывалі ў в. Замошша Бешанковіцкага раёна, а ён у г. Віцебску, часам прыязджаў вырашыць іх праблемы.

05.04.2017 Велігура знаходзіўся ў бацькоў у в. Замошша. З самай раніцы займаўся добрай справай, арганізаваў паездку маці да ўрача ў г. Віцебск. Каля 14 гадзін прыехаў у в. Соржыца, дзе ў краме набыў прадукты харчавання і бутэльку гарэлкі. Практычна ў бязлюднай вёсцы пражываў пенсіянер Карэлін. Жыў ціха, дапамагаў суседзям.

Шляхі Велігуры і Карэліна перасекліся на вясковай вуліцы, і бутэльку гарэлкі, набытую Велігурам, яны распілі ў лазні апошняга пад добрую закуску. Велігура пачаставаў Карэліна пачкам цыгарэт, Карэлін яго бярозавым сокам, па якім схадзілі разам. І ўсё было добра, але выпітага спіртнога аказалася мала. Велігура вырашыў з'ездзіць па гарэлку ў в. Соржыца. І трэба ж было такому здарыцца, што машына бацькі, якую ён не змог завесці раніцай для паездкі ў паліклініку, узяла і завялася. Адсутнасць вадзіцельскага пасведчання і не адбыты тэрмін пакарання ў выглядзе пазбаўлення права займацца дзейнасцю, звязанай з кіраваннем транспартнымі сродкамі, не спыніла Велігуру. Гарэлка была дастаўлена, і прыемныя зносіны за бутэлькай працягнуліся. У нейкі момант Велігура выявіў прапажу кашалька, які ён прыхапіў, калі кашалёк выпаў з кішэні невідушчага бацькі, і той не заўважыў гэтага. Падазрэнне пала на Карэліна, але той не прызнаўся ў крадзяжы. У адурманеным алкаголем свядомасці ўзніклі карціны зносін з бацькам наконт прапажы кашалька, і Велігура жорстка збіў Карэліна, а затым зноў сеў за руль аўтамабіля, які належаў яго бацьку, і з'ехаў з двара ў бок в. Целяпы. Разумеў, што парушае закон, едзе без вадзіцельскага пасведчання ў нецвярозым стане, убачыўшы сустрэчны аўтамабіль, няўдала зрабіў разварот, з'ехаў у кювет і, выскачыўшы з машыны, накіраваўся праз кусты да дома бацькоў. Па дарозе дадому паспеў пасварыцца з суседкай, а па прыездзе работнікаў міліцыі аказаць ім непадпарадкаванне. На наступны дзень Карэліна знайшлі мёртвым недалёка ад дома. Як вынік усяго зробленага Велігурам — узбуджэнне крымінальнай справы па 3 складах злачынстваў, і ў выніку Велігура прызнаны судом вінаватым у тым, што ён 05.04.2017, будучы ў стане алкагольнага ап'янення, у ходзе сваркі, якая ўзнікла на глебе непрыязных адносін, маючы намер на прычыненне менш цяжкіх цялесных пашкоджанняў пацярпеламу Карэліну, наўмысна нанёс апошняму не менш за 9 удараў кулакамі і абутымі нагамі ў вобласць галавы, шыі левай кісці, прычыніўшы яму, згодна з заключэннем эксперта, менш цяжкія цялесныя пашкоджанні.

Ён жа, з'яўляючыся асобай, якая раней здзейсніла злачынства, прадугледжанае ч.1 арт. 317-1 КК Рэспублікі Беларусь, за якое асуджаны 11.02.2013 судом Першамайскага раёна г. Віцебска за кіраванне транспартным сродкам асобай, якая знаходзіцца ў стане алкагольнага ап'янення, здзейсненае на працягу года пасля накладання адміністрацыйнага спагнання за такія ж парушэнні, 05.04.2017, будучы ў стане алкагольнага ап'янення, не маючы права кіравання транспартным сродкам, кіраваў аўтамабілем маркі «ВАЗ-2102», які належаў яго бацьку.