Сацыяльная дзяржава — беларуская мадэль дабрабыту. Такі лейтматыў семінара для дэпутацкага корпуса Віцебскай вобласці.

Маштабнае мерапрыемства правялі ў Гарадоцкім раёне. У ім удзельнічалі старшыня абласнога Савета дэпутатаў Дзмітрый Дзямідаў, член Пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльным развіцці Глеб Лапіцкі, старшыня райвыканкама Ірына Палякова, дэпутаты і кіраўнікі зацікаўленых службаў і ведамстваў з розных куткоў Віцебшчыны.

— Адна з задач улады на любым узроўні — стварэнне камфортных умоў для людзей незалежна ад таго, дзе яны пражываюць. Семінары для дэпутацкага корпуса — важнае і патрэбнае пачынанне, якое дазволіць нам больш дэталёва прааналізаваць рэалізацыю дзяржаўнай палітыкі ў розных сферах, абмеркаваць актуальныя пытанні сацыяльна-эканамічнага развіцця, — падкрэсліў Дзмітрый Дзямідаў. — Такі фармат працы дае магчымасць абмяняцца вопытам і выпрацаваць рашэнні, накіраваныя на павышэнне якасці жыцця насельніцтва.

У ходзе семінара дэпутаты асноўную ўвагу ўдзелілі перспектывам развіцця спорту і турызму, санаторна-курортнага лячэння і медыцынскага турызму. Таксама прысутныя ўсклалі кветкі да мемарыяльнага комплексу «Неўміручасць» у Гарадку, азнаёміліся з інфраструктурай турысцка-аздараўленчага комплексу «Лосьвіда», наведалі філіял «Гарадоцкі Дом рамёстваў і фальклору», лыжаролерную трасу ў Вераб'ёвых гарах і фізкультурна-аздараўленчы комплекс абласнога цэнтра алімпійскага рэзерву па зімовых відах спорту.

— Упэўнены, дэпутаты розных узроўняў ацэняць гэту ініцыятыву і падобныя сустрэчы будуць рэгулярна праводзіцца на месцах, спрыяць раскрыццю патэнцыялу гарадоў і раёнаў вобласці, — адзначыў Глеб Лапіцкі. — Калегі з розных рэгіёнаў змогуць бліжэй пазнаёміцца адзін з адным, падзяліцца ўнікальнымі напрацоўкамі, намеціць сумесныя праекты. Разам нам пад сілу зрабіць жыццё на малой радзіме і ў краіне ў цэлым яшчэ лепш, чарговы раз пацвердзіць, што Беларусь — сацыяльна арыентаваная дзяржава, дзе ў прыярытэце – дабрабыт людзей.

vitebsk-region.gov.by