Несумненна, наша рэспубліка валодае велізарным патэнцыялам для развіцця актыўнага турызму. Разнастайны ландшафт, які ўключае густыя лясы, чысцейшыя азёры, звілістыя рэкі і забалочаныя тэрыторыі, стварае спрыяльныя ўмовы для арганізацыі розных відаў актыўнага адпачынку, якія адпавядаюць інтарэсам шырокага кола турыстаў.

Для правядзення месяца актыўнага турызму зацверджаны план мерапрыемстваў, які ўключае прэс-канферэнцыі, акцыі, конкурсы, спаборніцтвы, семінары і іншыя падзеі ў розных галінах, якія дазволяць не толькі атрымаць асалоду ад актыўнага адпачынку, але і даведацца больш пра прыгажосць і гісторыю Беларусі.

Дзевяць маршрутаў распрацавана ў нашым раёне. Гэта веламашрут «Бешанковіцкія гарызонты», пешыя аглядныя маршруты па Астроўна, Уле, Бачейкаве і іншыя. Шэраг з іх з нагоды 80-годдзя Вялікай Перамогі прадугледжвае наведванне воінскіх пахаванняў і памятных месцаў, звязаных з Вялікай Айчыннай вайной.

Напрыклад, на мінулых выхадных АСК «Дзвіна» і ТІЦ «Бешанковічы» арганізавалі для землякоў турыстычны паход «Беларусь актыўная. Маршрут Незалежнасці», прымеркаваны да дзяржаўнага свята і абвешчанага ў ліпені месяцы актыўнага турызму (на здымку). Бешанковіцкія турысты наведалі памятныя месцы ў аграгарадках Ржаўка, Будзілава і Астроўна.

Калі і вы хочаце адправіцца ў паход па цікавых мясцінах нашага прыдзвінскага краю, звяртайцеся ў ТІЦ «Бешанковічы» па тэлефоне 6-56-62. Тут дапамогуць падабраць той маршрут, які вам абавязкова спадабаецца.

"Зара"