Галіна Унуковіч, старшыня Бешанковіцкага райвыканкама:

«У ходзе нарады кіраўнік дзяржавы падкрэсліў, што ўборка ўраджаю сёння — адна з самых важных тэм у краіне. Гэта экзамен для ўсіх аграрыяў і гарантыя нашай харчовай бяспекі.

Задача, пастаўленая перад намі, зразумелая: сабраць ураджай па максімуме, без страт, нягледзячы на любыя ўмовы надвор'я.

У нашым раёне ёсць усё неабходнае, каб правесці ўборачную на высокім узроўні. Падрыхтавана тэхніка, сфарміраваны кадры. Але галоўнае — гэта настрой людзей. Цяпер кожны дзень на рахунку, і мы бачым, што працаўнікі палёў гэта разумеюць.

Завершана ўборка азімага ячменю, гаспадаркі прыступілі да ўборкі азімага рапсу. У бліжэйшы час падыдзе чарга жыта, трыцікале, пшаніцы. Прапрацаваны ўсе моманты, каб пераход на новыя культуры праходзіў без паўзаў. Безумоўна, асаблівы акцэнт — на якасці збожжа: яно павінна быць не толькі сабрана, але і правільна высушана і адсартавана.

Аляксандр Рыгоравіч асобна спыніўся на дысцыпліне. У аснове любога выніку ляжыць строгае выкананне тэхналогій. Толькі дакладная арганізацыя і парадак у кожнай гаспадарцы дазволяць нам выканаць пастаўленую задачу. Менавіта таму месца кожнага кіраўніка цяпер — на палях, побач з людзьмі і тэхнікай, каб аператыўна вырашаць любыя пытанні.

Вынік нарады адназначны: планка ўраджаю мінулага года для нас — гэта арыенцір, які мы абавязаны перасягнуць. Справа толькі за намі — за арганізацыяй, дысцыплінай і самааддачай кожнага. Усе павінны быць мабілізаваны. Як сказаў Прэзідэнт: «Будзем з хлебам — будзем жыць».

"Віцебскія Весці"