Аб выніках далажыў старшыня абласнога камітэта прыродных рэсурсаў і аховы навакольнага асяроддзя Раман Кольца. Ён нагадаў, што мінулы год быў першым у пяцігодцы якасці, а асноўным напрамкам у рабоце стала навядзенне парадку на зямлі, добраўпарадкаванне населеных пунктаў. Адпаведныя мерапрыемствы ў рэгіёне праводзяцца штогод. Развіваецца сацыяльная, транспартная інфраструктура, вырашаюцца пытанні экалагічнай бяспекі, развіцця сістэмы абыходжання з адходамі і інш.

Населеныя пункты ў 2025-м працягнулі пераўтварацца: у іх актыўна праводзілася азеляненне, рамантавалі вулічна-дарожную сетку. Ажыццяўляўся знос пустуючых і старых дамоў. Вялікая ўвага была ўдзелена забеспячэнню работы сістэм пітнога водазабеспячэння, асвятленню вуліц, а таксама уладкаванню спартыўных і дзіцячых гульнявых пляцовак.

Сярод прыярытэтаў – навядзенне парадку на тэрыторыях сельскагаспадарчых арганізацый і вытворчых аб'ектаў.

Перад паўночным рэгіёнам на 2025-ы стаялі напружаныя задачы. Па шэрагу паказчыкаў трэба было выканаць на 10-15% больш, чым у папярэднім годзе.

Раман Кольца падкрэсліў, што план мерапрыемстваў быў зацверджаны рашэннем аблвыканкама № 212 «Аб правядзенні Года добраўпарадкавання» і ўключаў 88 пазіцый. Мерапрыемствы выкананы, на працягу года ўносіліся карэкціроўкі па павелічэнні заданняў. Акрамя таго, план быў дапоўнены.

У населеных пунктах высаджана больш за 41 тыс. дрэў і 29 тыс. кустоў, уладкавана і адрамантавана 25 га газонаў. Нарматыўны ўзровень азелянення ў 40% дасягнуты ва ўсіх гарадах рэгіёна.

Праводзілася работа па санітарнай ачыстцы вадацёкаў і вадаёмаў, рамонце і добраўпарадкаванні спартыўных пляцовак. На такіх аб'ектах устаноўлена і адрамантавана 118 малых архітэктурных форм, устаноўлена 82 кантэйнеры для збору адходаў. Добраўпарадкавана 14 крыніц.

– Выкананы планавыя заданні па ліквідацыйным тампанажы свідравін, – дадаў Раман Кольца. – Таксама выкананы работы па рэгуляванні распаўсюджвання і колькасці дурнічніка Сасноўскага на плошчы больш за 4,5 тыс. га з улікам паўторных работ. Асаблівую ўвагу ў 2026 годзе неабходна надаць рабоце па барацьбе з дурнічнікам Сасноўскага ў найбольш інвазіраваных раёнах: Браслаўскім, Віцебскім, Гарадоцкім, Аршанскім, Талачынскім, Ушацкім.

Што тычыцца ляснога фонду, то на яго тэрыторыі створана 18 новых экалагічных сцежак. Праведзены санітарныя высечкі на 5,5 тыс. га і расчыстка больш за 935 га ад ветравальна-бураломных насаджэнняў.

Добрыя дарогі – гэта лагістыка, патэнцыял для эканамічнага развіцця рэгіёна, бяспека і камфорт для перамяшчэння мясцовых жыхароў і турыстаў. У мінулым годзе ў вобласці праведзены бягучы рамонт рэспубліканскіх аўтадарог працягласцю 268 км. Тэрыторыю побач з транспартнымі артэрыямі ўпрыгожылі больш за 80 малых архітэктурных форм. Для падтрымання чысціні і парадку ўздоўж аўтадарог было ўстаноўлена звыш чатырох дзясяткаў кантэйнераў для збору адходаў.

На станцыях і прыпыначных пунктах чыгунак адрамантавана восем пасажырскіх платформ і дзесяць прыпыначных пунктаў.

Вялікая ўвага надаецца і сістэме абыходжання з адходамі і другаснымі матэрыяльнымі рэсурсамі. Будуюцца і мадэрнізуюцца смеццесартавальныя комплексы, укараняюцца новыя метады і тэхналогіі выкарыстання ТКО і г.д. Па дадзеных на пачатак студзеня ў вобласці эксплуатуецца 22 палігоны цвёрдых камунальных адходаў, 6 закрыты.

У эксплуатацыю ўведзены Наваполацкі рэгіянальны комплекс па абыходжанні з ТКО, у сувязі з чым палігоны цвёрдых камунальных адходаў Наваполацка і Ушачаў падлягаюць закрыццю.