Прэзідэнт Беларусі Аляксандр Лукашэнка сустрэўся са старшынёй Следчага камітэта Расійскай Федэрацыі Аляксандрам Бастрыкіным, перадае карэспандэнт БЕЛТА.

"Ваш візіт у Беларусь я заўсёды разглядаю як вельмі важны. І наша з вамі сустрэча, і ваш візіт да мяне - гэта не толькі візіт ветлівасці, як дыпламаты кажуць. Хоць і не без гэтага. Ёсць пра што пагаварыць, абмеркаваць пытанні. Мы з вамі прытрымліваемся адной лініі, адной пазіцыі. У нас ніколі не было разыходжанняў пры ацэнцы ні ўнутраных, ні знешніх фактараў існавання Расіі, Беларусі. Таму для мяне вельмі важна, што вы хоць на некалькі хвілін, але зазірнеце да мяне і мы зможам звярыць гадзіннікі. Для мяне гэта, падкрэсліваю, вельмі важна. Вы сапраўдны не толькі мой сябар, але і нашага беларускага народа", - сказаў кіраўнік дзяржавы.

Аляксандр Лукашэнка адзначыў, што ўважліва, наколькі гэта магчыма, сочыць за працай Аляксандра Бастрыкіна. "Вельмі рады, што ў складаныя і цяжкія часы вам усё ж неяк удаецца ўтрымліваць сваю сістэму, структуру і працаваць на карысць не толькі Расіі, але і нашага саюза, які мы імкнемся пабудаваць", - сказаў ён.

У сваю чаргу Аляксандр Бастрыкін падзякаваў за магчымасць сустрэчы. "Хацеў бы вас праінфармаваць, што толькі што я пабываў на сур'ёзнай міжнароднай канферэнцыі, прысвечанай генацыду савецкага народа, рабіў там выступленне", - адзначыў ён.

Пасля сустрэчы ў Прэзідэнта запланавана рабочая сустрэча Бастрыкіна з калегамі са Следчага камітэта Беларусі. "Мы падвядзём вынікі сумеснай працы за 2025 год і намяцім перспектывы працы на 2026-ы, каб дамагацца вынікаў у сумеснай працы па асноўных стратэгічных напрамках супрацоўніцтва", - распавёў кіраўнік СК Расійскай Федэрацыі.

Як паведамляла БЕЛТА, Аляксандр Бастрыкін у Мінску прыняў удзел у III Міжнароднай навукова-практычнай канферэнцыі, прымеркаванай да 77-годдзя з дня прыняцця Канвенцыі Арганізацыі Аб'яднаных Нацый аб папярэджанні генацыду і пакаранні за яго.

belta.by