Трэба распавядаць, перапыніўшы гады маўчання, пра тое, які цяжкі след пакінула польская ўлада на беларускіх землях, адарваных ад Савецкай рэспублікі. Пра гэта Прэзідэнт Беларусі Аляксандр Лукашэнка заявіў 17 верасня на сустрэчы з ідэалагічным актывам, гістарычнай і экспертнай супольнасцю, прысвечанай Дню народнага адзінства, перадае карэспандэнт БЕЛТА.

"Што б ні адбывалася сёння (у адносінах Беларусі і Польшчы. - Заўв. БЕЛТА), мы не лічым памылкай тое, што доўгія гады стараліся жыць з суседзямі ў міры, не кідаючы ў твар непрыемныя для іх гістарычныя факты (ну што тут шкадаваць аб гэтым), - сказаў кіраўнік дзяржавы. - Пакуль мы думалі пра сяброўства, там з нас рабілі недачалавекаў і адкрытых ворагаў. І ў культуры, і ў навуцы, і ў сродках масавай інфармацыі. У выніку (яны. - Заўв. БЕЛТА) выпрацавалі тую палітыку, якую сёння маем".

Таму, на думку Прэзідэнта, трэба больш распавядаць пра прэдысторыю паходу Чырвонай арміі. "Распавядаць, перапыніўшы гады маўчання пра тое, які цяжкі след пакінула польская ўлада на землях, адарваных ад нашай Савецкай рэспублікі, - падкрэсліў Аляксандр Лукашэнка. - Нашы людзі павінны ведаць, што беларусаў рабавалі, пакуль этнічная Польшча квітнела, квітнела, што нашы рэсурсы вывозіліся, а селянін, які працаваў на знос за капейкі, жыў у галечы і пад страхам пугі. І гэтая пуга апускалася на кожнага, хто спрабаваў змагацца за сваю веру, мову, сваю культуру".

Трэба гаварыць і пра тое, што жыхары Заходняй Беларусі былі пазбаўленыя права вучыцца на роднай мове, праваслаўныя храмы зачыняліся, нацыянальныя эліты і святары пераследаваліся, перакананы Аляксандр Лукашэнка.

"Мы ўсе павінны памятаць, што польскія турэмныя ўстановы былі перапоўнены беларускімі патрыётамі, што нацыя знішчалася і духоўна, і фізічна - самым жорсткім чынам", - звярнуў увагу кіраўнік дзяржавы.

Так ці інакш, гэтыя тэмы ўжо абмяркоўваюцца ў сучаснай Беларусі. І не трэба было б збірацца на сустрэчу на ўзроўні Прэзідэнта, каб зноў падыскутаваць па такіх пытаннях. "Мы ж сабраліся для таго, каб знайсці нешта новае - новы напрамак, які, як моладзь кажа, зайшоў бы, зачапіў бы людзей", - звярнуў увагу беларускі лідар.

Асабліва важна, паводле яго слоў, распавядаць, як гераічна заходнія беларусы супраціўляліся, аб'ядноўваліся ў барацьбе, імкнуліся да ўз'яднання з усходняй часткай. "Гэта сапраўды гістарычны прыклад народнага адзінства", - канстатаваў Прэзідэнт.

Аднак застаецца пад пытаннем, наколькі эфектыўна гэтыя факты агучваюцца ў краіне, пачынаючы са школьнага падручніка і заканчваючы экспазіцыямі ў музеях, экскурсіямі па памятных мясцінах, абазначыў праблемны аспект кіраўнік дзяржавы. Асаблівы акцэнт Аляксандр Лукашэнка зрабіў менавіта на падручніках: "Калі са школьнага ўзросту нам удалося пераканаць, укласці ў галаву дзяцей тое, што мы хочам і пра што гаворым, значыць, мы дабіліся поспеху. Потым цяжка будзе пераканаць гэтых дзяцей у адваротным".

Прэзідэнт падкрэсліў, што па ўсіх перыядах беларускай гісторыі варта прааналізаваць акцэнты: якія даты і падзеі важныя, хто героі, хто ворагі.

belta.by