Праграма сацыяльна-эканамічнага развіцця Беларусі на 2026-2030 гады павінна быць якаснай, дзейснай і без пражэктаў. Аб гэтым кіраўнік дзяржавы Аляксандр Лукашэнка заявіў на нарадзе аб дапрацоўцы адпаведнай праграмы, перадае карэспандэнт БЕЛТА.

"Нам трэба падрыхтаваць якасную і сапраўды працоўную праграму! Без пражэктаў. Зыходзячы з жыцця, нашага досведу і наяўных рэсурсаў", - заявіў беларускі лідар.

Аляксандр Лукашэнка нагадаў, што яшчэ летам урадам была распрацавана канцэпцыя праграмы на наступную пяцігодку. Прапанаваны шэраг прыярытэтаў, запыт на якія неаднаразова гучаў у грамадстве, яны былі закладзены ў перадвыбарную праграму Прэзідэнта. У тым ліку цыфравізацыя эканомікі, моцныя рэгіёны, дарогі і транспартная інфраструктура, даступнае жыллё, якасць мабільнай сувязі, турызм, павышаныя стандарты камфорту.

"Акрамя таго, у нас хапае надзённых пытанняў у эканамічнай сферы, прычым у такіх напрамках, якія маюць высокі патэнцыял развіцця і могуць стаць драйверам эканамічнага росту: павышэнне ўзроўню тэхналагічнасці вытворчасцей, інвестыцыйнай актыўнасці прадпрыемстваў, зніжэнне ўсіх відаў затрат, рост прадукцыйнасці працы і многія іншыя", - сказаў Прэзідэнт.

Кіраўнік дзяржавы адзначыў, што літаральна праз месяц дакумент павінен быць унесены на разгляд Усебеларускага народнага сходу: "Гэта пытанне нашай стратэгіі, перш за ўсё сацыяльна-эканамічнага развіцця. Хоць усе там пытанні адлюстраваны. Таму дэлегаты УНС павінны разгледзець гэту праграму і прыняць яе згодна з Канстытуцыяй".

"Цяпер надзвычай важна прыняць правільныя праектныя рашэнні і прадставіць іх на разгляд дэлегатам УНС. Пасля абмеркавання, магчымай дапрацоўкі і зацвярджэння праграма пяцігодкі стане законам для далейшай працы ўсіх дзяржаўных органаў і арганізацый. Значыць, тое, што мы прапішам і што будзе прынята на УНС, павінна няўхільна выконвацца, - сказаў кіраўнік дзяржавы. - Дзяржаўныя і рэгіянальныя праграмы, а таксама штогадовыя прагнозныя і іншыя дакументы павінны пасля прыняцця цалкам адпавядаць рашэнням УНС. Скарэктаваць іх, унесці змены ў напрамкі развіцця краіны стане магчыма толькі праз рашэнне гэтага прадстаўнічага сходу".

belta.by