Шмат цёплых слоў удзячнасці за шматгадовую працу на карысць раёна сёння прагучала ў адрас старшыні райсавета дэпутатаў Генадзя Шведава
Генадзь Міхайлавіч прыняў рашэнне сысці ў адстаўку, і дэпутаты падтрымалі яго выбар.
Напутлівыя словы на адрас Генадзя Міхайлавіча, якія прагучалі ад старшыні дэпутацкага корпуса вобласці Дзмітрыя Дзямідава, старшыні райвыканкама Галіны Унуковіч, калег, былі прасякнуты глыбокай павагай.
З 2010 года Генадзь Міхайлавіч узначальваў раённы Савет дэпутатаў. Ён быў годным кіраўніком, чалавекам, якога заўсёды адрознівалі высокі прафесіяналізм і жаданне дапамагаць людзям.
«Сёння дэпутацкі корпус Бешанковіччыны баяздольны, ён можа і робіць усё магчымае для таго, каб наш раён квітнеў і з кожным днём станавіўся лепш, а жыццё землякоў было больш якасным», — адзначыў Генадзь Шведаў і шчыра падзякаваў калег-дэпутатаў за плённае супрацоўніцтва.
За шматгадовую добрасумленную працу ў органах мясцовага кіравання і самакіравання, асабісты ўклад у сацыяльна-эканамічнае развіццё Бешанковіцкага раёна Генадзь Міхайлавіч удастоены Ганаровай граматы раённага выканаўчага камітэта.