Каб сустрэцца з навучэнцамі 9-11 класаў школ раёна і каледжа, пагаварыць аб выбары прафесіі, у Улу прыехалі прадстаўнікі Віцебскай дзяржаўнай акадэміі ветэрынарнай медыцыны, Беларускай дзяржаўнай сельскагаспадарчай акадэміі, аграрнага каледжа ветэрынарнай акадэміі, арганізацый – заказчыкаў кадраў, спецыялісты раённага звяна, райветстанцыі.

Аб сваіх дасягненнях аднагодкам расказалі навучэнцы агракласаў Астроўненскай СШ імя К. А. Абазоўскага і Бачэйкаўскай СШ імя М. А. Высогорца.

Удзел у мерапрыемстве прыняла і старшыня райвыканкама Галіна Унуковіч.

***

Кірмаш мэтавай падрыхтоўкі прайшоў у форме дыялогавай пляцоўкі.

Мадэратарам выступіла начальнік аддзела па адукацыі райвыканкама Вольга Красакова.

Будучых выпускнікоў пазнаёмілі са спецыяльнасцямі, якія можна атрымаць у навучальных установах, у тым ліку ва Ульскім каледжы, расказалі аб магчымасці ўзяць мэтавае накіраванне, якое гарантуе перавагі пры паступленні і абавязковае працаўладкаванне пасля вучобы.

Сёння на Бешанковіччыне працуюць 27 маладых спецыялістаў, 16 прыйшлі на працу ў 2025 годзе. 10 чалавек працуюць на падставе заключаных дагавораў аб мэтавай падрыхтоўцы.

Сельгаспрадпрыемствам раёна патрэбны ветурачы, заатэхнікі, жывёлаводы, аператары машыннага даення, механізатары, вадзіцелі, зваршчыкі.

Магчыма, на гэтай сустрэчы хлопцы па-сапраўднаму зазірнулі ў будучыню, каб зразумець, якой справай яны хочуць займацца.

"Зара"