Нікалькі сотняў удзельнікаў сабраў у Віцебску велапрабег у межах акцыі «Дзень без аўтамабіля». Маршрут пралягаў ад вул. 33-й Арміі да плошчы Сцяга і Герба.

Сваім удзелам акцыю падтрымалі старшыня абласнога Савета дэпутатаў Дзмітрый Дзямідаў, член Савета Рэспублікі начальнік абласнога ўпраўлення МНС Сяргей Мялешкін, першы намеснік міністра прыродных рэсурсаў і аховы навакольнага асяроддзя Максім Лысенка, старшыня абласнога камітэта прыродных рэсурсаў і аховы навакольнага асяроддзя Раман Кольца.

Самым дасведчаным удзельнікам велапрабегу быў жыхар Сенна 80-гадовы Уладзімір Станкевіч. На працягу свайго жыцця ён неаднаразова ўдзельнічаў у розных спаборніцтвах і мерапрыемствах. Прачытаўшы пра акцыю, вырашыў падтрымаць яе, праўда, з прычыны ўзросту не адважыўся ўвесь шлях ад Сенна да Віцебска (каля 60 км) пераадолець на веласіпедзе – палову праехаў на грамадскім транспарце. У цэлым за дзень Уладзімір Пятровіч накручвае 20-30 км.

Адной з самых прадстаўнічых была дэлегацыя «Энергакамплекта». Па словах намесніка дырэктара прадпрыемства Сяргея Красноўскага, у калектыве папулярны веласіпедны рух. Рэгулярна праводзяцца карпаратыўныя велапрабегі, у залежнасці ад магчымасцей удзельніка выбіраецца маршрут у 25, 50 і 100 км. Прычым аматары двухколавай тэхнікі аддаюць перавагу перамяшчацца не па дарогах агульнага карыстання, а палявымі і ляснымі. Самы вялікі карпаратыўны велапрабег сабраў 100 удзельнікаў – амаль кожнага дзясятага работніка прадпрыемства. А на працу штодня прыязджаюць на веласіпедзе каля 70 чалавек.

На плошчы Флага і Герба адбылося ўрачыстае мерапрыемства. Максім Лысенка нагадаў, што Беларусь далучылася да міжнароднай акцыі «Дзень без аўтамабіля» ў 2008 годзе. У нашай краіне штогадовыя выкіды забруджвальных рэчываў у атмасфернае паветра складаюць 865 тыс. т, з іх 49 % прыпадае на мабільныя крыніцы.

– Кожны з нас можа на дзень адмовіцца ад аўтамабіля, перасесці на грамадскі транспарт, ровар ці іншыя сродкі персанальнай мабільнасці і даць прыродзе глыток свежага паветра, – падкрэсліў Максім Лысенка.

Дзмітрый Дзямідаў адзначыў, што Беларусь нездарма называюць лёгкімі Еўропы. Мы захавалі лясы, балоты, лугі. У краіне праводзіцца зялёная палітыка, калі пры развіцці населеных пунктаў і стварэнні новых прадпрыемстваў пытанні экалогіі выходзяць на адно з вядучых месцаў.

– Шануйце, любіце і беражыце сваю зямлю. Ад гэтага залежыць, у якіх умовах будзеце жыць вы і вашы дзеці, – звяртаючыся да моладзі, заклікаў кіраўнік дэпутацкага корпуса Віцебшчыны.

У гэты дзень прайшлі спаборніцтвы сярод навучэнцаў устаноў адукацыі «ВелаВіцебск». У парку 1000-годдзя была прадстаўлена выстава электратранспарту, дзейнічалі тэматычныя пляцоўкі МНС, ДАІ, АМАП, дэпартамента «Ахова».

vitebsk-region.gov.by