Мікалай Снапкоў і Аляксандр Субоцін павіншавалі сям'ю Котавых з Расонскага раёна
Напярэдадні навагодніх святаў вялікая сям'я Котавых з аграгарадка Клясціцы Расонскага раёна прымала гасцей. Пазнаёміцца з жыхарамі дзіцячага дома сямейнага тыпу і ўручыць ім падарункі прыехалі першы намеснік прэм'ер-міністра Беларусі Мікалай Снапкоў і старшыня аблвыканкама Аляксандр Субоцін. І адразу трапілі ў казку. Інсцэніроўку пра чароўны гадзіннік прыдумалі і разыгралі ўсе члены сям'і. Старэйшыя дзеці апрануліся ў касцюмы Дзеда Мароза, Снягуркі і Бабы-Ягі, малодшыя – у Сняжынак і Снягавікоў.
Ганна і Аляксей Котавы сталі бацькамі для 25 дзяцей, двое з якіх родныя, адна дзяўчынка ўдачораная, астатнія прыёмныя. Але гэта дзяленне толькі ў дакументах, насамрэч усе хлопчыкі і дзяўчынкі, якія зараз жывуць у доме і якія ўжо, стаўшы дарослымі, пакінулі яго, для сямейнай пары родныя. Акрамя таго, у Котавых ужо чацвёра ўнукаў.
Адносіны ў гэтай дружнай сям'і будуюцца на даверы, разуменні і любові. Гэта бачна няўзброеным вокам. Усе разам клапоцяцца пра чысціню і парадак у доме, добраўпарадкоўваюць прылеглую тэрыторыю, з задавальненнем працуюць на прысядзібным участку. Тры гады таму кіраўніцтва вобласці падарыла гэтай дружнай і працавітай сям'і трактар, які стаў падмогай у вырошчванні гародніны да абедзеннага стала. І ёлку ўпрыгожвалі разам цацкамі, якія беражліва захоўваюцца ў доме шмат гадоў.
Бацькі ва ўсім падтрымліваюць дзяцей, развіваюць іх здольнасці. Выхаванцы дзіцячага дома сямейнага тыпу не раз станавіліся пераможцамі творчых конкурсаў. А свае дасягненні запісваюць у «Кнігу жыцця». Сямейны летапіс вядуць ужо больш за дзесяць гадоў.
Ганна Котава – лаўрэат абласной прэміі імя Героя Савецкага Саюза Зінаіды Тусналобывай-Марчанкі, пераможца рэспубліканскага конкурсу «Жанчына года». Сярод яе ўзнагарод – і дыплом абласнога конкурсу аматарскіх відэафільмаў «Шчаслівыя моманты сем'яў». Кіраўнік сям'і не адстае ад жонкі, прымае актыўны ўдзел у культурных і грамадскіх мерапрыемствах.
Вялікая ўвага ў сям'і надаецца здароваму ладу жыцця. Дарослыя і дзеці разам займаюцца фізкультурай, праводзяць адпачынак на прыродзе.
– Навагодняя пара – час чараўніцтва, падарункаў, загадвання жаданняў. Акцыя «Нашы дзеці», якая праводзіцца ў Беларусі шмат гадоў, – добрая, светлая, яна дапамагае ажыццявіць мары. Асабліва важна ў гэтыя дні пабываць там, дзе больш за ўсё маюць патрэбу ў цяпле і клопаце, – адзначыў Аляксандр Субоцін, які падарыў сям'і вялікі тэлевізар, а дзецям – прысмакі і футбольныя мячы. Як аказалася, у футбол гуляюць нават дзяўчынкі.
А Мікалай Снапкоў, апроч набору бытавой тэхнікі, прывёз, як растлумачыў, тое, што сам любіць, – развіваючыя кнігі, настольную гульню для вялікай кампаніі і беларускія цукеркі.
– Цуды мы творым самі. Хіба такая вялікая дружная сям'я – не цуд? Прычым не толькі навагодні, а пастаянны, сапраўдны, - сказаў Мікалай Снапкоў.