Жыхарка Бешанковіч Надзея Яфімаўна пачала размову са старшынёй райвыканкама са слоў падзякі. Даведаўшыся пра тое, што наш гарпасёлак па выніках рэспубліканскага конкурсу прызнаны адным з самых добраўпарадкаваных населеных пунктаў у краіне, яна захацела асабіста падзякаваць Галіне Уладзіміраўне за каласальную працу па добраўпарадкаванні райцэнтра і ў той жа час унесла свае прапановы па далейшым навядзенні парадку.

У прыватнасці, размова ішла пра парк, што знаходзіцца на тэрыторыі былога аграсэрвісу (паблізу скрыжавання вуліц Чарняхоўскага і Віцебскай шашы).

«Абавязкова будзем добраўпарадкоўваць», — запэўніла жанчыну Галіна Унуковіч.

Агучыла заяўніца і тэму выдалення аварыйных дрэў на могілках, указваючы на сасну, якая нахілілася, у месцы пахавання ў вёсцы Беразні. Вырашыць пытанне даручана Бешанковіцкаму сельвыканкаму. А Верхненскі сельвыканкам, СУП «Свіціна-ВМК» і ўпраўленне па працы, занятасці і сацыяльнай абароне райвыканкама вывучаць пытанне, што тычыцца ўмоў пражывання ветэрана працы з в. Луг. Па словах Надзеі Яфімаўны, жанчыне, якой ужо за 90 гадоў, патрэбна дапамога ў рамонце веранды.

Садзейнічання ў працаўладкаванні ў кіраўніка раёна прасіла жыхарка вёскі Пяцігорск. Пытанне вырашана падчас прыёму. Жанчыне падабралі месца працы, якое яе задаволіла.

"Зара"