Пракуратурай раёна праведзена праверка захаванасці і належнай эксплуатацыі жыллёвага фонду

Пракуратурай Бешанковіцкага раёна праведзена праверка арганізацыі работы УКП ЖКГ «Бешанковіцкі камунальнік» у сферы належнага выкарыстання і захаванасці жыллёвага фонду. У ходзе рэйдавых мерапрыемстваў абследаваны шматкватэрныя жылыя дамы, размешчаныя ў г.п.Бешанковічы, выяўлены наступныя недахопы.

Згодна з п.п. 8.1.9, 8.1.10 ТКП 45-1.04-305-2016 «Тэхнічны стан тэхнічнае абслугоўванне будынкаў і збудаванняў» (далей – ТКП) пры эксплуатацыі жалезабетонных канструкцый будынкаў не дапускаецца разбурэнне ахоўнага пласта бетону і карозія арматуры.

Разам з тым, на асобных элементах брылёў пад'ездаў жылога дома № 4 па вул. Будаўнікоў (пад'езд № 3), № 25 па вул.Чарняхоўскага (пад'езд № 1), №34 па вул.Чарняхоўскага (пад'езд №3) маюцца значныя пашкоджанні жалезабетону, месцамі аголена арматура, бачныя сляды карозіі. Пры аглядзе ўваходу ў пад'езд № 3 дома № 36 устаноўлена, што бетонная аснова абветрылася, агаліліся жалезныя бэлькі, да якіх прымацаваны ўпор для брыля пад'езда. Бэлькі значна выступаюць над паверхняй ганка, што стварае пагрозу для траўміравання людзей. Аналагічнае парушэнне выяўлена пры аглядзе ўваходу ў пад'езд № 2 дома № 38 па вул.Чарняхоўскага.

Згодна з п.8.4.5, 8.4.6 ТКП вонкавыя сцены будынкаў варта абараняць ад кандэнсацыйнай вільгаці, павелічэнне вільготнасці сценавых матэрыялаў будынка, выкліканае атмасфернымі ападкамі, варта прадухіляць шляхам падтрымання ў спраўным стане месцаў прымыкання да сцен брылёў над уваходамі і над балконамі верхніх паверхаў, даху, пакрыццяў карнізаў.

Разам з тым, у ходзе агляду ўстаноўлена, што ў шэрагу жылых дамоў месцы прымыкання да будынкаў брылёў над уваходамі маюць шчыліны, у якія пранікаюць атмасферныя ападкі, пра што таксама сведчыць утварэнне ачагоў цвілі ў месцах прымыкання і на паверхнях сцен жылых дамоў, наяўнасць пацёкаў. Так, напрыклад, пры аглядзе дома №25 па вул.Чарняхоўскага ўстаноўлена, што з-за пранікнення вільгаці пад брыль пад'езда №1 у месцы прымыкання да дома ўтварылася вялікая колькасць цвілі, частка жалезабетоннай сцяны і брыля з-за ўздзеяння ападкаў дэфармавана і абсыпаецца, аголеная арматура мае сляды іржы. Аналагічныя парушэнні выяўлены пры абследаванні пад'ездаў № 1, 2 жылых дамоў № 34 па вул.Чарняхоўскага, пад'езда № 3 дома № 40, дома № 24, пад'езда № 1 дома № 8 па вул.Чарняхоўскага, дома № 92 па вул.Урыцкага.

У адпаведнасці з п. 8.2.2 ТКП фундаменты і сцены падвалаў павінны мець ненарушаную гарызантальную і вертыкальную гідраізаляцыю, якая выключае пранікненне грунтавых, дажджавых і іншых вод і вадкасцей у матэрыял фундаментаў і сцен падвалаў. У мэтах выканання п. 8.2.16 ТКП у працэсе эксплуатацыі падвальныя памяшканні павінны быць чыстымі, сухімі. Разам з тым, у падвале дома № 30 па вул.Чарняхоўскага пры абследаванні выяўлена значнае падтапленне. Акрамя таго, у парушэнне п.8.11.1 ТКП у цокальнай пліце дома выяўлены расколіны.

Пры абследаванні пад'езда №3 дома № 90 па вуліцы Урыцкага выяўлена павелічэнне вільготнасці сцяны жылога дома на ўзроўні 1-2 паверхаў. Устаноўлена, што ў падвале названага пад'езда таксама назапасілася значная колькасць вады, з таго ж боку дома ідзе пераўвільгатненне цокальных пліт і сцен – як вынік наяўнасць цвілі і расколін у тынкоўцы, што таксама парушае п.8.4.8 ТКП.