💰 Аб парадку ажыццяўлення адлічэнняў за прадпрымальніцкую дзейнасць, якая аказвае непасрэднае ўздзеянне на гісторыка-культурную каштоўнасць або зоны яе аховы

Сродкі, атрыманыя ад названых адлічэнняў, ідуць на рэалізацыю мер, накіраваных на правядзенне навукова-даследчых, праектных і рамонтна-аднаўленчых работ на матэрыяльных гісторыка-культурных каштоўнасцях, выяўленне і ўлік гісторыка-культурных каштоўнасцей, ажыццяўленне іншых мерапрыемстваў па захаванні і прымнажэнні гісторыка-культурнай спадчыны.

Парадак выканання суб'ектамі гаспадарання патрабаванняў аб выплаце абавязковых адлічэнняў у Фонд Прэзідэнта Рэспублікі Беларусь па падтрымцы культуры і мастацтва рэгулююцца Палажэннем, зацверджаным Указам Прэзідэнта Рэспублікі Беларусь ад 18 кастрычніка 2007 г. № 527 «Аб некаторых пытаннях аховы гiсторыка-культурнай спадчыны».

Памеры адлічэнняў складаюць ад прыбытку, атрыманага ў выніку такой дзейнасці:

• для юрыдычных і фізічных асоб Рэспублікі Беларусь, у тым ліку ІП — 5 працэнтаў;
• для замежных юрыдычных і фізічных асоб — 25 працэнтаў.

Звяртаем увагу, што ў мэтах выканання Указа неабходна кіравацца вызначэннем прыбытку, выкладзеным у пункце 3 Палажэння. Пад прыбыткам, з якога вылічаюцца адлічэнні, маецца на ўвазе даход, які застаецца ў распараджэнні суб'ектаў гаспадарання пасля выплаты падаткаў, збораў (пошлін), іншых абавязковых плацяжоў, устаноўленых заканадаўчымі актамі Рэспублікі Беларусь.

Да непасрэднага ўздзеяння, якое аказваецца прадпрымальніцкай дзейнасцю на гісторыка-культурную каштоўнасць або зоны яе аховы, адносіцца:

• стварэнне дадатковых аб'ёмна-прасторавых збудаванняў, у тым ліку ўзвядзенне прыбудоў, уладкаванне і размяшчэнне нестацыянарных аб'ектаў гандлю і грамадскага харчавання, сродкаў вонкавай рэкламы і іншых аб'ектаў на тэрыторыі каштоўнасці і (або) у зонах яе аховы;
• стварэнне пляцовак для стаянак і пад'ездаў аўтамабільнага транспарту;
• змяненне функцыянальнага выкарыстання (адсутнасць навуковага абгрунтавання змянення і (або) стварэнне дадатковага функцыянальнага прызначэння) гісторыка-культурнай каштоўнасці, памяшканняў у ёй, уладкаванне новых уваходных груп, ганкаў, брылёў, вентыляцыйных сістэм, знешніх кандыцыянераў, спадарожнікавых антэн, убудаваных банкаматаў;
• пагаршэнне адметных асаблівасцей гісторыка-культурнай каштоўнасці пры выкананні патрабаванняў пажарнай бяспекі, аховы навакольнага асяроддзя, санітарных і іншых патрабаванняў.

У адпаведнасці з пунктам 13 Палажэння на Міністэрства культуры і структурныя падраздзяленні мясцовых выканаўчых і распарадчых органаў ускладзена метадычнае, арганізацыйнае садзейнічанне і кантроль за своечасовасцю адлічэнняў і паўнатой выплаты кампенсацый.

База для разліку разгляданых адлічэнняў для суб'ектаў гаспадарання, якія ажыццяўляюць сваю дзейнасць адначасова ў гісторыка-культурных каштоўнасцях і ў іншых будынках (памяшканнях), якія не з'яўляюцца гісторыка-культурнымі каштоўнасцямі, разлічваецца ў адпаведнасці з заканадаўчымі актамі Рэспублікі Беларусь.

Разлік названага даходу за справаздачны год ажыццяўляецца суб'ектамі гаспадарання самастойна ў адпаведнасці з заканадаўчымі актамі Рэспублікі Беларусь, а таксама ўліковай палітыкай, прынятай дадзеным суб'ектам гаспадарання ў адпаведнасці з Законам Рэспублікі Беларусь «Аб бухгалтарскім уліку і справаздачнасці».