Аднымі з першых на заклік аб дапамозе адгукнуліся служачыя райвыканкама і райсавета дэпутатаў, работнікі ўстаноў культуры, адукацыі і аховы здароўя. Іх працоўны дэсант высадзіўся на малочна-таварным комплексе «Чарнагосце» ў ЗАТ «АСБ-Агра Наватар».

Тут узводзіцца новы прафілакторый для цялят. Задача — здаць аб'ект як мага хутчэй, каб стварыць для жывёл камфортныя ўмовы. Пакуль будаўнікі вядуць асноўныя работы, дэсантнікаў задзейнічалі на абшыўцы сцен.

«Дзякуючы «Агра-Дэсанту» мы адчувальна паскорым здачу прафілакторыя, — падкрэсліў дырэктар гаспадаркі Аляксей Бухалавіч. — Гэта не проста акцыя — гэта рэальны ўклад у будаўніцтва сучаснага жывёлагадоўчага аб'екта і будучыню нашага статка. Дзякуй усім за падтрымку!»

На працягу двух тыдняў «Агра-Дэсант» будзе працаваць у трох сельгаспрадпрыемствах раёна. У прыярытэце — будаўніцтва жывёлагадоўчых аб'ектаў, добраўпарадкаванне ферм і відавая праполка збожжавых культур.

Як адзначаюць арганізатары, падобныя мерапрыемствы вырашаюць адразу дзве важныя задачы. Першая — канкрэтная практычная дапамога працаўнікам вёскі, якой, як вядома, шмат не бывае. Другая — наглядная дэманстрацыя таго, што раён — гэта адзіны арганізм, дзе гарачая пара аднаго калектыву становіцца агульнай клопатам.

У Бешанковіцкім раёне ўмеюць працаваць разам. І акцыя «Агра-Дэсант» — лепшае таму пацвярджэнне.

"Зара"