Сёння старшыня раёна Галіна Унуковіч правяла чарговы асабісты прыём грамадзян
Са сваімі пытаннямі на прыём прыйшлі два грамадзяніны.
Просьбу звярнуць увагу на якасць правядзення капітальнага рамонту шматкватэрнага дома №24 на вуліцы Інтэрнацыянальнай у Бешанковічах агучыў адзін з жыхароў дома.
Як высветлілася, выяўленыя недахопы ў выкананні будаўнічых работ звязаны з недакладнасцямі ў праектна-каштарыснай дакументацыі.
«У найкароткія тэрміны правядзём на аб'екце штаб з удзелам праекціроўшчыкаў, каб дэталёва разабрацца ў сітуацыі», — запэўніла заяўніка Галіна Унуковіч.
Яшчэ адзін грамадзянін распавёў пра свае планы абсталяваць у Міцькавічах свайго роду экавёску. Для будаўніцтва жылых дамоў неабходная драўніна, ёсць пытанні і з выдзяленнем магутнасці электраэнергіі да ўчастка.
Пытанне абмеркавалі з удзелам кіраўнікоў лясгаса і РЭС. Заяўніку дадзены тлумачэнні.