Семінар-нарада з кіруючым складам участковых камісій па выбарах Прэзідэнта Беларусі адбыўся ў Віцебскім аблвыканкаме
У мерапрыемстве прынялі ўдзел старшыня аблвыканкама Аляксандр Субоцін, намеснік старшыні аблвыканкама Вячаслаў Дурноў, старшыня Віцебскай абласной выбарчай камісіі Дзмітрый Хома, начальнік УУС аблвыканкама Андрэй Любімаў.
Аляксандр Субоцін падзякаваў усім сабраўшымся за ўдзел у выбарчай кампаніі, а гэта старшыні і сакратары участковых выбарчых камісій некалькіх раёнаў, якія непасрэдна на месцах будуць арганізоўваць сам працэс галасавання.
– Выбары – гэта ключавая палітычная падзея, якая вызначыць будучыню ўсёй Беларусі, што асабліва важна, улічваючы тое, што адбываецца на сусветнай палітычнай арэне, – акцэнтаваў увагу Аляксандр Субоцін. – Да вас, вашай працы цяпер прыкавана ўвага дзясяткаў тысяч грамадзян. Вы выдатна ведаеце, як важна і як, часам, складана, нягледзячы на ціск звонку, захоўваць вернасць закону і беларускаму народу. І вы з гэтым, безумоўна, спраўляецеся. Працуйце спакойна, упэўнена, у выпадку пазаштатных сітуацый праваахоўнікі прыйдуць да вас на дапамогу.
– У цэлым задзейнічана вялікая колькасць членаў камісій, таму па чатырох тэрытарыяльных зонах на працягу чатырох дзён мы будзем праводзіць такія мерапрыемствы, каб максімальна ахапіць рэгіён, – сказаў Дзмітрый Хома. – У іх будуць прымаць удзел старшыні і сакратары участковых выбарчых камісій, якія непасрэдна на месцах будуць арганізоўваць сам працэс галасавання. На сённяшні дзень ужо павінны быць канчаткова сфарміраваны спісы грамадзян, якія маюць права ўдзельнічаць у выбарах. Кожны грамадзянін ужо з сённяшняга дня мае права азнаёміцца, ці ўключаны ён у спіс. Гэта ключавы момант. Завершана афармленне ўчасткаў, заўтра апошні дзень, калі на іх павінны быць размешчаны матэрыялы аб кандыдатах у Прэзідэнты. Задача абласной камісіі зрабіць так, каб кожны грамадзянін, які пражывае на тэрыторыі Віцебскай вобласці, мог рэалізаваць сваё выбарчае права і былі створаны роўныя ўмовы для ўсіх: і для тых, хто галасуе, і для кандыдатаў у Прэзідэнты.
Ва ўстаноўленыя тэрміны ў вобласці ўтворана 26 тэрытарыяльных камісій (абласная, 21 раённая, Наваполацкая гарадская і 3 раённыя ў Віцебску) па выбарах Прэзідэнта Рэспублікі Беларусь, у склад якіх увайшло 287 чалавек. Гаррайвыканкамамі ўтворана 672 участкі для галасавання і столькі ж участковых камісій па выбарах Прэзідэнта Рэспублікі Беларусь, у склад якіх увайшло больш за 8 тысяч чалавек.