🎓 Абітурыенту: Як стаць ратавальнікам?

Выбар будучага шляху

Для цяперашніх адзінаццацікласнікаў застаюцца лічаныя тыдні для таго, каб вызначыцца з выбарам будучага шляху. Пра тое, дзе можна атрымаць прафесію, звязаную з забеспячэннем бяспекі і выратаваннем людзей, расказалі ў абласным УМНС.

Тых, хто вырашыў звязаць жыццё з прафесіяй ратавальніка, запрашаюць установы адукацыі Міністэрства па надзвычайных сітуацыях Рэспублікі Беларусь.

Універсітэт грамадзянскай абароны (УДА) МНС

Спецыяльнасці:

  • «Папярэджанне і ліквідацыя надзвычайных сітуацый» (толькі юнакі)
  • «Пажарная і прамысловая бяспека» (юнакі і дзяўчаты)

Тэрмін навучання: 4 гады (дзённая форма).
Экзамены (ЦТ): матэматыка, фізіка, руская (беларуская) мова.

Да паступлення ўсе кандыдаты ў абавязковым парадку праходзяць прафесійны адбор, які ўключае: правядзенне спецыяльных праверак, вывучэнне маральных і дзелавых якасцей, медыцынскі агляд ваенна-ўрачэбнай камісіяй, вызначэнне ўзроўню фізічнай падрыхтаванасці кандыдатаў.

Перавагі навучання ва УДА МНС: усе курсанты забяспечваюцца месцамі для пражывання, харчаваннем, форменным абмундзіраваннем, дзяржаўным страхаваннем і медыцынскім абслугоўваннем, а таксама грашовым забеспячэннем (у сярэднім каля 300 рублёў штомесяц). Падчас вучобы курсанты маюць магчымасць навучыцца практычнаму кіраванню і атрымаць вадзіцельскае пасведчанне катэгорыі «В».

Выпускнік атрымлівае афіцэрскае званне «лейтэнант унутранай службы», яму гарантавана працаўладкаванне. Размяркоўваюцца выпускнікі ў большасці выпадкаў па месцы жыхарства або ў бліжэйшыя да яго падраздзяленні.

Абітурыенты, якія не прайшлі па конкурсе за кошт сродкаў бюджэту, могуць прыняць удзел у конкурсе на дзённую форму навучання на ўмовах аплаты.

Спецыялізаваны ліцэй пры УДА МНС (г. Гомель)

Мэтанакіравана да паступлення ў ВНУ сістэмы нацыянальнай бяспекі Беларусі рыхтуе навучэнцаў Спецыялізаваны ліцэй пры Універсітэце грамадзянскай абароны МНС Беларусі ў Гомелі.

Каго прымаюць: юнакі, якія завяршылі навучанне ў 6 класе.
Тэрмін навучання: 5 гадоў (з 7-га па 11-ы класы) ва ўмовах кругласутачнага пражывання.
Уступныя выпрабаванні: матэматыка, руская (беларуская) мова. Залічэнне праводзіцца па конкурсе на падставе набранай сумы балаў.

Навучэнец ліцэя знаходзіцца на поўным дзяржаўным забеспячэнні (абмундзіраванне, пяціразовае харчаванне, пражыванне, медыцынскае абслугоўванне). У Ліцэі створана ўнікальная вучэбна-трэніровачная і матэрыяльна-тэхнічная база: навучальныя і спальныя карпусы, спартыўная, трэнажорная, барцоўскія залы, 25-метровы плавальны басейн.

Важна: Выпускнікі ліцэя пры наяўнасці ў атэстаце адзнак 7 балаў і вышэй маюць права паступаць у ВНУ сілавых структур без здачы ЦТ.

Па-за конкурсам пры ўмове атрымання на ўступных выпрабаваннях адзнак не ніжэй за 4 балы ў парадку пералічэння залічваюцца асобы, якія маюць прадугледжаныя заканадаўствам льготы.

Полацкі дзяржаўны хіміка-тэхналагічны каледж

Для тых, хто не паступіў ва УГЗ, добрым выбарам будзе паступленне ў Полацкі дзяржаўны хіміка-тэхналагічны каледж.

Спецыяльнасць: «Папярэджанне і ліквідацыя надзвычайных сітуацый».
Тэрмін навучання: 2 гады і 7 месяцаў (дзённае аддзяленне, бюджэтная аснова).
Каго прымаюць: юнакі ад 17 да 25 гадоў, якія маюць атэстат аб агульнай сярэдняй адукацыі. Усім, хто мае патрэбу, прадастаўляецца інтэрнат.

Выпускнікі каледжа атрымліваюць рабочую прафесію «выратавальнік-пажарны» і працаўладкоўваюцца ў органы і падраздзяленні па надзвычайных сітуацыях на пасады радавога і малодшага начальніцкага складу. Пасля заканчэння каледжа выпускнікі маюць права паступаць ва УГЗ на скарочаную завочную форму навучання (тэрмін навучання 3 гады).

Паважаныя выпускнікі!

Служба ў шэрагах МНС Рэспублікі Беларусь ганаровая і прэстыжная. Афіцэры МНС сёння карыстаюцца заслужаным аўтарытэтам і павагай у насельніцтва, многія з іх за мужнасць і гераізм пры выратаванні людзей узнагароджаны ордэнамі і медалямі.

Паступленне ва ўстановы адукацыі МНС дае вам шэраг пераваг:

  • курсанты знаходзяцца на поўным дзяржаўным забеспячэнні (пражыванне, харчаванне, забеспячэнне форменным абмундзіраваннем і стыпендыяй);
  • магчымасць навучання практычнаму ваджэнню (бясплатна) з атрыманнем вадзіцельскага пасведчання катэгорыі «В»;
  • работнікам прадастаўляецца магчымасць займацца навуковай, творчай і выкладчыцкай дзейнасцю (у т.л. за аплату);
  • дзяржаўнае страхаванне жыцця і здароўя;
  • гарантаванае працаўладкаванне і забеспячэнне першага працоўнага месца, выпускнікі прызначаюцца на пасады начальніка каравула або інспектара Дзяржаўнага пажарнага нагляду;
  • бясплатны праезд па тэрыторыі Рэспублікі Беларусь да месца правядзення водпуску і назад;
  • работнікам МНС, якія знаходзяцца ў водпуску, у поўным аб'ёме выплачваецца заработная плата і дапамога на аздараўленне;
  • бясплатнае медыцынскае абслугоўванне работнікаў МНС і членаў іх сем'яў ажыццяўляецца ў ведамасных установах аховы здароўя;
  • забеспячэнне жыллём з дзяржаўнага жыллёвага фонду і службовымі жылымі памяшканнямі;
  • захавана дзяржаўная падтрымка пры будаўніцтве або набыцці жылых памяшканняў у выглядзе выдзялення крэдыту пад 5% гадавых;
  • выслуга гадоў, якая дае гарантаванае пенсійнае забеспячэнне, складае 20 гадоў, кожны наступны год службы дадае 3% да пенсійнага забеспячэння;
  • у выслугу гадоў ідзе тэрмін навучання ў навучальнай установе МНС.

Куды звяртацца і карысныя спасылкі

⏳ Тэрмін падачы заяў

Дакументы для паступлення неабходна падаць да 20 красавіка.

Афармленне дакументаў і фарміраванне вучэбнай справы:

Бешанковіцкі раённы аддзел па надзвычайных сітуацыях
Адрас: г.п. Бешанковічы, вул. Урыцкага, 100
Тэлефоны: 6-51-00, 6-51-89, 6-51-81, 6-51-01

Там вам адкажуць на ўсе пытанні, якія вас цікавяць, і дапамогуць з афармленнем дакументаў для паступлення ва УГЗ, Спецыялізаваны ліцэй пры УГЗ або Полацкі каледж.

Сайты і матэрыялы: