Для уральцаў гэтая паездка - частка шматгадовага праекта па вяртанні імёнаў загінуўшых воінаў на родную зямлю. Як расказала намеснік старшыні Арцінскай ветэранскай арганізацыі Любоў Ватрына, з Арцінскага раёна пайшло на фронт 15 тысяч чалавек, 6 тысяч з іх не вярнуліся. 
 
«Наша галоўная мэта - захоўваць гістарычную памяць. Мы займаемся пошукам месцаў пахаванняў і перадаём сваякам жменьку зямлі з магіл іх продкаў, каб яны маглі спачываць на роднай зямлі», - падзялілася Любоў Ватрына.

Галоўнай кропкай візіту расіян на Бешанковіцкі край стаў мемарыяльны комплекс «Узрэчча». Менавіта тут, на беразе Заходняй Дзвіны, у чэрвені 1944-га вырашаўся лёс не толькі раёна, але і ўсёй наступальнай аперацыі «Баграціён». Для уральцаў гэта месца - асаблівае. Воды Дзвіны памятаюць подзвіг іх земляка, малодшага сяржанта Івана Чарапанава.

Ураджэнец Арцінскага раёна, камандуючы кулямётным аддзяленнем, адным з першых фарсіраваў водную перашкоду ля вёскі Забор'е. Апынуўшыся на воражым беразе, ён агнём станкавога кулямёта захапіў плацдарм і ўтрымліваў яго да пераправы ўсяго батальёна, замяніўшы загінулага камандзіра ўзвода. За гэты мужны ўчынак 22 ліпеня 1944 года Івану Чарапанаву было прысвоена званне Героя Савецкага Саюза. 

У памяць пра героя і ўсіх загінуўшых воінаў госці і прадстаўнікі ўлады раёна, райсавета ветэранаў ушанавалі подзвіг абаронцаў Айчыны хвілінай маўчання і ўсклалі кветкі да помніка.

Як падкрэсліла намеснік старшыні райвыканкама Алена Баранова, якая гасцінна сустрэла членаў дэлегацыі, такія сустрэчы - не проста даніна традыцыі, а найважнейшы элемент выхавання моладзі і абароны гістарычнай праўды ад спроб перапісвання вынікаў вайны.

"Зара"