Навіны раёна
23 жніўня 2023 года
Вада ў крыніцах Бешанковіцкага раёна адпавядае нормам
Такое заключэнне днямі далі спецыялісты раённага цэнтра гігіены і эпідэміялогіі ў абвяржэнне чутак аб тым, што пасля дажджоў вада ў крыніцах, у прыватнасці, каля в. Ніжняе Крывіна, не бяспечная для піцця.
Адбор проб праводзіўся з крыніц, якія найбольш папулярныя сярод жыхароў раёна. Гэта:
«Лясная крыніца» (Ніжняе Крывіна);
Крыніца на левым беразе р. Крывінка (крыніца водазабеспячэння былога аздараўленчага лагера «Арляня»);
Крыніца на вул. Даўгова (Бешанковічы, правы бераг Заходняй Дзвіны, за мастом);
Крыніца ў в. Пяцігорск (злева па дарозе на Улу);
Крыніца ў в. Фраловічы (справа за мастом).
«Вада крыніц даследавана па мікрабіялагічных, санітарна-хімічных і арганалептычных паказчыках, — адзначыла галоўны санітарны ўрач раёна Ніна Карпушэнка. – Пробы вады адпавядаюць Гігіенічнаму нарматыву пітной вады ў крыніцах нецэнтралізаванага водазабеспячэння».
Улічваючы, што названыя крыніцы водазабеспячэння з'яўляюцца адкрытымі, неабароненымі ад уплыву ліўневых, паводкавых вод, уздзеяння іншых крыніц магчымага мікробнага і хімічнага забруджвання, работнікі РЦГЭ прадоўжаць лабараторны кантроль за бяспекай вады ў крыніцах.