Для таго, каб працэс не абмяжоўваўся толькі справаздачамі на паперы, спецыялісты Бешанковіцкага раённага цэнтра гігіены і эпідэміялогіі праводзяць кантрольна-наглядныя мерапрыемствы. У ходзе выездаў правяраецца, наколькі аператыўна і, галоўнае, якасна камунальная служба і ўладальнікі будынкаў прыбіраюць галалёд і снег.

Асаблівая ўвага падчас рэйдаў надаецца пешаходным зонам, падыходам да сацыяльна значных аб'ектаў і дваравых тэрыторыям. Спецыялісты ацэньваюць не толькі сам факт уборкі, але і яе якасць: ці пасыпаны дарожкі супрацьгалалёднымі рэагентамі, ці ачышчаны ганкі да асновы і іншае.

Падобныя выезды носяць не толькі карны, але і прафілактычны характар. Прамы дыялог з адказнымі за гэту важную працу асобамі дазваляе вырашаць многія праблемы, што ўзнікаюць, на месцы, не чакаючы скаргаў ад насельніцтва. У выпадку ігнаравання ўстаноўленых санітарных нормаў або зацягвання тэрмінаў уборкі да адказных асоб прымяняюцца меры адміністрацыйнага ўздзеяння.
«Маніторынг санітарнай ачысткі і добраўпарадкавання тэрыторый гарадскога пасёлка Бешанковічы і населеных пунктаў раёна, вытворчых аб'ектаў прадпрыемстваў і арганізацый усіх форм уласнасці ажыццяўляецца штодня, у тым ліку па выхадных, — расказвае памочнік урача-гігіеніста ДУ «Бешанковіцкі раённы цэнтр гігіены і эпідэміялогіі» Ксенія Скарнякова. — Толькі ў студзені і лютым бягучага года ў плане правядзення ацэнкі санітарнай ачысткі і добраўпарадкавання намі абследавана 307 аб'ектаў, парушэнні выяўлены ў 224 выпадках. У ведамствы накіравана 85 лістоў, 1 — аб прыцягненні да дысцыплінарнай адказнасці. У дачыненні да 7 суб'ектаў гаспадарання пачаты і вядуцца справы аб адміністрацыйным правапарушэнні.

У іх ліку цэнтр паслуг «Бешсіці» ППТУП «Рэум», крама «Грошык» філіяла ТАА «Еўрагандаль» у г. Віцебску», рынак у г. п. Бешанковічы Бешанковіцкага філіяла Віцебскага абласнога спажывецкага таварыства, вытворчы ўчастак №7 г. п. Бешанковічы СААТА «Белвест», ППТУП «Тандыпак», УКП ЖКГ «Бешанковіцкі камунальнік» і крама «Прозапас» КТУП «Полацкі рынак г. Віцебска» абласнога спажывецкага таварыства.

У цэнтры паслуг «Бешсіці», напрыклад, на момант правядзення кантрольна-наглядных мерапрыемстваў не праводзілася па меры неабходнасці бягучая ўборка: не ўтрымліваліся ў чысціні ўваходная група і падлогі на першым паверсе. Не была праведзена своечасовая ачыстка тэрыторыі, пандуса, ганка і прыступак цэнтра ад усіх відаў снежных, лядовых і снежна-лядовых утварэнняў з апрацоўкай дазволенымі да прымянення супрацьгалалёднымі сродкамі.

У неналежным санітарным стане таксама знаходзіліся ўваходная група і падлога ў гандлёвых залах крам «Грошык» і «Прозапас». Іх бягучая ўборка не праводзілася. У «Грошыку» несвоечасова ад снегу і лёду ачышчаліся тэрыторыя, паркоўкі для аўтамабіляў, пандус, ганкі і прыступкі крамы, не была праведзена апрацоўка паверхняў супрацьлёдавымі рэагентамі. У краме «Прозапас» акрамя тэрыторыі і ганка ўборка ледзяных утварэнняў патрабавалася і з даху.

Толькі часткова санітарная ачыстка і ўборка тэрыторый ад снегу і лёду на момант наведвання спецыялістамі санітарнай службы была праведзена на рынку г. п. Бешанковічы, вытворчым участку №7 «Белвест», ППТУП «Тандыпак», усе названыя не правялі апрацоўку супрацьлёдавымі сродкамі. На ўчастку «Белвест» і ў «Тандыпаку» з дахаў будынкаў над ганкамі звісалі ледзяшы.
На аналагічныя парушэнні, выяўленыя на тэрыторыях шэрагу шматкватэрных жылых дамоў у райцэнтры, Астроўна, Будзілава, Ржаўцы, пасадачных пляцоўках прыпынкаў грамадскага транспарту, тратуарах, пешаходных дарожках і пешаходных пераходах у райцэнтры, указана УКП ЖКГ «Бешанковіцкі камунальнік».

!Спецыялісты падкрэсліваюць: чысціня і бяспека тэрыторый — гэта агульная задача, якая патрабуе дысцыпліны як ад дзяржаўных службаў, так і ад уласнікаў прыватных будынкаў. Сістэматычны маніторынг дазваляе трымаць сітуацыю пад кантролем нават у перыяды багатых снегападаў, забяспечваючы бесперабойную працу ўсёй інфраструктуры і бяспеку кожнага жыхара раёна.

"Зара"