Прэзідэнт Беларусі Аляксандр Лукашэнка 17 снежня падпісаў указ №439 "Аб арэнднай плаце за зямельныя ўчасткі, якія знаходзяцца ў дзяржаўнай уласнасці". Пра гэта БЕЛТА паведамілі ў прэс-службе беларускага лідара.

Дакументам устаноўлены памер такой платы - роўны памеру зямельнага падатку, які разлічваецца ў адпаведнасці з падатковым заканадаўствам. Пры гэтым на плацельшчыкаў арэнднай платы будуць распаўсюджвацца прадугледжаныя Падатковым кодэксам льготы па зямельным падатку.

Захоўваюцца дзеючыя ў цяперашні час тэрміны выплаты арэнднай платы, а таксама тэрміны прадастаўлення юрыдычнымі асобамі сум арэнднай платы ў падатковыя органы.

Дагаворы арэнды будуць прыводзіцца ў адпаведнасць з указам паступова - пры паступленні заяў ад арандатараў, у выпадку падаўжэння тэрмінаў арэнды зямельных участкаў і пры прыняцці мясцовымі органамі ўлады, адміністрацыямі свабодных эканамічных зон (СЭЗ) рашэнняў аб дзяржаўнай рэгістрацыі змянення прадастаўленых у арэнду зямельных участкаў.

З 1 студзеня 2026 года палажэнні ўказа будуць прымяняцца да ўсіх зямельных участкаў, якія знаходзяцца ў дзяржаўнай уласнасці і прадастаўлены ў арэнду мясцовымі выканаўчымі камітэтамі, адміністрацыямі СЭЗ.

Меры, прадугледжаныя указам, накіраваны на ўдасканаленне сістэмы спагнання арэнднай платы за зямельныя ўчасткі і стварэнне роўных умоў для ўсіх землекарыстальнікаў незалежна ад віду правоў на зямельныя ўчасткі.

belta.by