У Бешанковічах прайшоў заключны этап Рэспубліканскай акцыі «Бяспека ў кожны дом»
Рэспубліканская прафілактычная акцыя «Бяспека ў кожны дом!» фінішавала на тэрыторыі Бешанковіцкага раёна. Пяты яе этап быў праведзены ва ўніверсаме «Культтавары» раённага цэнтра.
Маладыя прадстаўнікі Беларускай маладзёжнай грамадскай арганізацыі ратавальнікаў-пажарных сумесна з Бешанковіцкімі ратавальнікамі правялі тлумачальную працу з кожным пакупніком, акцэнтавалі ўвагу прысутных на асноўныя прычыны ўзнікнення пажараў і гібелі людзей ад іх, правілы бяспекі, якія трэба выконваць для таго, каб пазбегнуць трагічных наступстваў, на дзеянні ў выпадку ўзнікнення надзвычайных сітуацый, а таксама дзякуючы працы інтэрактыўнай пляцоўкі наглядна паказалі прынцып устаноўкі і працы АПІ.
Асабліва цікавіў жыхароў макет печы, дзякуючы якому ратавальнікі наглядна і даступна тлумачылі ўсе правілы і нюансы карыстання печамі, распавядалі, на што варта звяртаць увагу, а таксама што рабіць, калі бяда ўсё ж пастукалася ў дом.
Выстава наглядна-выяўленчай прадукцыі, прэзентацыя мабільнага прыкладання «МНС Беларусі: Дапамога побач» узмацнілі эфект праведзенай акцыі.
Актыўны ўдзел жыхароў горада ў правядзенні акцыі, шматлікія пытанні па мерах прафілактыкі пажараў, сведчаць пра важнасць і актуальнасць правядзення падобных мерапрыемстваў.