У Бешанковіцкім раёне ўтворана раённая камісія па выбарах Прэзідэнта Рэспублікі Беларусь
У Бешанковіцкім раёне ўтворана раённая камісія па выбарах Прэзідэнта Рэспублікі Беларусь.
Адпаведная пастанова прынята на сумесным пасяджэнні прэзідыума раённага Савета дэпутатаў і раённага выканаўчага камітэта.
У склад камісіі ўвайшлі 11 чалавек. Усе суб'екты, якія валодаюць правам вылучэння сваіх прадстаўнікоў у склад камісіі, скарысталіся ім. Гэта палітычныя партыі, грамадскія аб'яднанні, працоўныя калектывы і грамадзяне шляхам падачы заяў.
«Ад зладжанай і дакладнай працы кожнага з нас сёння залежыць якасць выбарчай кампаніі і бяспека людзей на нашай тэрыторыі, — падкрэсліла старшыня райвыканкама Галіна Унуковіч. — Выбар, які мы зробім, вызначыць наша будучыню. Упэўнена, што кожны з нас прагаласуе за моцную, незалежную і квітнеючую краіну. Краіну, якая мае сацыяльна арыентаваную накіраванасць, дзе абараняюцца інтарэсы грамадзян і ў прыярытэце мір і нармальныя ўзаемаадносіны з іншымі краінамі».
У кампетэнцыі раённай камісіі не толькі арганізацыя правядзення выбараў, але і ажыццяўленне кантролю за выкананнем заканадаўства. Як адзначана на пасяджэнні, у камісію адабраны дасведчаныя людзі, якія здольныя правесці гэту адказную працу якасна і на высокім узроўні.