У Бешанковіцкім раёне працэнт гатоўнасці тэхнікі да пасяўной складае 83%
Гатоўнасць сельгастэхнікі да вясны ацаніла кіраўнік раёна Галіна Унуковіч
Галіна Уладзіміраўна пабывала на мехдварах і ў мехмайстэрнях гаспадарак, у тым ліку і прыватнай формы ўласнасці.
Адказныя за дадзены напрамак далажылі аб праведзенай рабоце. Усяго па раёне працэнт гатоўнасці тэхнікі да веснавых палявых работ на дадзены момант складае 83%.
«Тэмпы рамонту неабходна нарошчваць, — падкрэсліла Галіна Унуковіч. – Па кожнай адзінцы тэхнікі вызначаны свой фронт работ. Яго неабходна выканаць якасна і ў адпаведнасці з графікам, каб правесці пасяўную без усякага напружання».
Асаблівую ўвагу варта надаць і навядзенню парадку на мехдварах. На жаль, факты бясгаспадарнасці ёсць, іх неабходна ўстараніць у самыя сціслыя тэрміны.
Свой аб'ём работ па падрыхтоўцы тэхнікі і ў меліяратараў. Пра іх кіраўніка раёна праінфармаваў дырэктар ДП «Бешанковіцкае ПМС» Сяргей Шчупечонак.
Усяго на прадпрыемстве задзейнічана каля 60 адзінак тэхнікі. Распрацаваны план яе рамонту на год. У асноўным гэта бягучыя рамонты.
Дарэчы, у бліжэйшы час машынна-трактарны парк меліяратараў папоўніцца яшчэ адной адзінкай тэхнікі – у распараджэнне прадпрыемства днямі паступіць кран коштам больш за 500 тысяч рублёў.