Рашэннем райвыканкама вызначаны афіцыйныя месцы для масавага адпачынку з арганізацыяй купання і зацверджаны план мерапрыемстваў, накіраваных на ахову жыцця і здароўя людзей.

Афіцыйных месцаў для купання ў раёне па-ранейшаму два. Гэта правераныя вадаёмы, дзе дно абследавана вадалазамі, а на беразе дзяжураць ратавальнікі. Месцам масавага адпачынку ля вады вызначаны гарадскі пляж, размешчаны на беразе вадаёма «Чыстыя пруды» паблізу вуліцы Віцебскае шасэ, на выездзе з гарадскога пасёлка Бешанковічы, і пляж, размешчаны на беразе возера Белае, у межах зямельнага ўчастка аграсядзібы «Пушкароўская» (у вёсцы Пушкары Астроўненскага сельсавета). Ва ўсіх астатніх месцах — уключаючы берагі рэк, кар'еры і тэхнічныя вадаёмы — купанне строга забаронена.

Як паведаміў рэдакцыі старшыня раённай арганізацыі грамадскага аб'яднання «Беларускае рэспубліканскае таварыства ратавання на водах» Сулейман Садыкаў, на «Чыстых прудах» у Бешанковічах прадпрыемствам меліярацыйных сістэм ужо праведзены важныя работы. Спецыялісты ачысцілі і пашырылі акваторыю першага вадаёма, прызначанага для купання дзяцей і іх суправаджаючых. Таксама ачышчаны і пашыраны ўваход у другі вадаём, адведзены для купання дарослых. Выняты грунт будзе вывезены ў бліжэйшы час, пасля чаго выканаюць планаванне берагавой лініі. На пляж ужо пачалі завозіць свежы пясок.

«Ёсць дамоўленасць з лясгасам аб усталяванні каля другога вадаёма яшчэ адной альтанкі, — распавядае Сулейман Садыкаў. — «Бешанковіцкі камунальнік» усталюе тут больш высокія лежакі і распранальню. Для захаванасці пляжнага абсталявання, інфармацыйных стэндаў і знакаў бяспекі ўкараняюцца сучасныя меры абароны — на «Чыстых сажалках» у гэтым сезоне з'явяцца камеры відэаназірання. Выканаць усё запланаванае ў тэрмін шмат у чым дапамагае садзейнічанне ў вырашэнні праблемных пытанняў намесніка старшыні райвыканкама Віктара Эдмундавіча Грышана, за што яму вялікая падзяка».

Для кожнага афіцыйнага пляжу зараз праходзіць актуалізацыя тэхнічнага пашпарта. Гэты дакумент пацвярджае, што акваторыя праверана вадалазамі, дно ачышчана ад небяспечных прадметаў, а інфраструктура адпавядае ўсім нормам. Больш таго, на пляжах будуць дзяжурыць людзі, якія не проста «прыглядаюць» за парадкам, але і ўмеюць навучаць плаванню, а ў выпадку бяды — кваліфікавана аказаць першую дапамогу тапельцу.
Асаблівая ўвага надаецца бяспецы дзяцей. Перад пачаткам масавага адпачынку адказныя асобы арганізуюць абавязковыя абходы ўзбярэжжа, каб выключыць любыя рызыкі на замацаваных тэрыторыях. Сваю працу ўзмоцняць і праваахоўнікі: Бешанковіцкі РАУС у межах кампетэнцыі забяспечыць на пляжах ахову грамадскага парадку і арганізуе бяспечны дарожны рух на пад'ездах да іх. Да патрулявання зон адпачынку таксама прыцягнуць членаў добраахвотных народных дружын.

У школах раёна ўжо абнаўляюцца куткі бяспекі, дзе размяшчаецца актуальная інфармацыя аб правілах паводзін на вадзе і культуры адпачынку для дзяцей і іх бацькоў.
Агульная бяспека пачынаецца з асабістай дысцыпліны. Адпачывайце толькі ў афіцыйна ўстаноўленых месцах, беражыце пляжную інфраструктуру і заўсёды памятайце, што вада памылак не даруе.

"Зара"