У мэтах арганізацыі рацыянальнага выкарыстання электраэнергіі будуць арыентавацца на астранамічны каляндар усходу-заходу сонца.

Выглядаць гэта будзе так: уключэнне праз 45 хвілін пасля заходу сонца і выключэнне за 45 хвілін да ўсходу сонца.

Пры гэтым, у залежнасці ад метэаралагічных і сезонных умоў вонкавае асвятленне ў ранішнія гадзіны можа адключацца пазней часу ў графіках, у вячэрнія гадзіны – уключацца раней.

Такі графік вызначаны на ўзроўні Віцебскага аблвыканкама.

«Каб перабудавацца на новы графік, даналадзіць аўтаматычную сістэму, у Бешанковічах спатрэбілася некалькі дзён, — растлумачыў начальнік аддзела Яўген Кандраценка. — Таму ўзнікалі некаторыя адхіленні па часе пры ўключэнні і адключэнні асвятлення. Цяпер сістэма наладжана і працуе ў штатным рэжыме».

Пры гэтым на ўчастках павышанай адказнасці — на цэнтральных праездных вуліцах — працягвае дзейнічаць асаблівы рэжым асвятлення. Пытанні бяспекі з'яўляюцца абсалютным прыярытэтам.

Нагадаем, 3 лютага Аляксандр Лукашэнка даручыў скарэктаваць рэжым асвятлення на вуліцах з мэтай эканоміі электраэнергіі і выключэння збытковых выдаткаў. Прэзідэнт звярнуў увагу, што цяпер раніцай асвятленне адключаецца занадта позна, а ўключаецца занадта рана, калі на вуліцы і так дастаткова светла.

"Зара"