У Астравно прайшоў Траецкі фестываль
У Дзень Святой Тройцы ў аграгарадку Астроўна прайшло VIII раённае свята духоўнай культуры і народнай творчасці «Траецкі фестываль».
Пачалося яно з Боскай літургіі ў храме Святой Жыццедайнай Тройцы, якую ўзначаліў вікарый Віцебскай епархіі епіскап Друцкі Яўсевій. Апоўдні на пляцоўцы каля Астроўненскага сельскага Дома культуры адкрыліся гандлёвыя рады, розныя выставы-кірмашы вырабаў майстроў. У праграме свята былі таксама майстар-класы, міжрэгіянальны інклюзіўны арт-пікнік для людзей з інваліднасцю і грамадзян пажылога ўзросту «Сёмуха. Траецкія забавы», конкурсы, сувеніры і сапраўднае рысталішча…
З прывітальным словам да ўдзельнікаў фестывалю на адкрыцці канцэрта духоўнай музыкі ў сельскім Доме культуры звярнуліся намеснік старшыні райвыканкама Аляксандр Ерашоў і вікарый Віцебскай епархіі епіскап Друцкі Яўсевій.
Віншуючы ўсіх са светлым святам, Аляксандр Ерашоў асаблівыя словы падзякі адрасаваў духавенству — за мудрае настаўніцтва і вернае служэнне Богу і людзям: «У гэты блаславенны дзень, калі мілата Божая сыходзіць у нашы душы, мы асабліва востра адчуваем адзінства ў веры, любові і надзеі. Тройца нагадвае нам пра вялікую сілу ўзаемаразумення, міласэрнасці і клопату пра бліжніх, заклікае захоўваць мір у сэрцах і ствараць дабро. Ваша адданасць справе, вера дапамагаюць захоўваць духоўныя традыцыі і маральныя ўстоі, на якіх трымаецца наша грамадства. Жадаю кожнаму з вас крэпасці духу, невычарпальнай радасці і сямейнага дабрабыту. Няхай малітва, якая гучыць у храмах, умацоўвае нашу веру, а добрыя справы стануць асновай любові і згоды ў грамадстве».
У сваю чаргу, падзякаваўшы за ўвагу, вікарый Віцебскай епархіі епіскап Друцкі Яўсевій напуціў: «Няхай святло Бога ўвойдзе ў вашае жыццё, у вашы дамы, асвеціць вашы сэрцы і зробіць вашае жыццё паўнавартасным, прыгожым і шчаслівым».
Духоўная музыка заваёўвае сэрцы, абуджаючы ў слухача самым узнёслыя пачуцці, напаўняе яго жыццё сэнсам і гармоніяй. Нягледзячы на тое, што атмасфера душэўнай цеплыні панавала на ўсіх пляцоўках фестывалю. А натхнялі гледачоў вакальны ансамбль «Камертон» ГУК «Залатое кальцо» г. Віцебска «Дзвіна», клірасны вакальна-харысты ансамбль «Аршанскі Дабравест» храма Нараджэння Прасвятой Багародзіцы Віцебскай Епархіі г. Орша, Ганна Шаўцова, Святлана Тарноўская, Ніна Слаўсяр, прафесар Санкт-Пецярбургскага каледжа штат Фларыда (ЗША), лаўрэат міжнародных конкурсаў, Алена Слаўсяр і Людміла Зорына з КДЦ «Першамайскі», заслужаны аматарскі калектыў Рэспублікі Беларусь ансамбль народнага танца «На ростанях», народная вакальная група «Лагода» УА «Віцебскі дзяржаўны каледж культуры і мастацтваў», дуэт цымбалістаў Сяргея Цімашэнкі і Кацярыны Мельнікавай з Віцебскага дзяржаўнага музычнага каледжа ім. І. І. Салерцінскага, народны вакальны калектыў «Ветэран» Бешанковіцкага РЦК.
У Астроўскай школе на канцэрце дзіцячых творчых калектываў цяпло сваіх сэрцаў шчодра дарылі юныя прыдзвінцы: мясцовы тэатральны калектыў «Ба́тлейка» (кіраўнік — Валянціна Шарко), лялечны тэатр з Чашнікаў. Запомніліся пранікнёныя выступленні навучэнцаў — Веранікі Піскуновай з Бочакава, Сафіі Губарэвіч з райцэнтра, Валерыі Саляр з Астроўна.
Нікога не пакінулі абыякавымі запальныя рытмы відовішчнага канцэрта народнай і фальклорнай музыкі. Сваім талентам жыхароў і гасцей аграгарадка радавалі народны вакальны ансамбль «Бярэзіначка» філіяла Домжарыцкага СДК ДУК «Лепельскі раённы Дом культуры», народны вакальны ансамбль «Явар» Талачынскай дзіцячай школы мастацтваў, кавер-бэнд «Неба славян» Чашніцкай дзіцячай школы мастацтваў, народны фальклорны ансамбль «Вечарынка» Сенненскага раённага цэнтра культуры і народнай творчасці, ансамбль лажкароў «Забаўныя ложкі» Бешанковіцкай ДШМ, народны ансамбль народнай песні «Вясёлуха» Бешанковіцкага РЦК, харэаграфічны калектыў «Не балет» Астроўненскай ДШМ, ансамбль народнай музыкі «Беларускі сувенір» Талачынскай ДШМ і ансамбль казачай песні «Вольніца» з Віцебска.
!Якое ж свята без пачастункаў? Па традыцыі ўсе ахвотныя маглі паспытаць юшкі з яечняй! Маляўніча і феерычна — вечаровым канцэртам і святочным феерверкам — завяршыўся фестываль у Астроўна! Увечары гледачоў забаўлялі эстрадная студыя КВЦ «Першамайскі», народны поп-гурт «Дзвіна» ДУ «Палац культуры «Руба». А таксама салісты Вольга Зароўская і Віталь Ягораў, Аляксандр Малажэнка.
Марыя САНЬКО.