Больш за 200 байцоў студэнцкіх атрадаў, камандзіраў і камісараў тэрытарыяльных штабоў, ветэранаў моладзевага руху Беларусі і кіраўнікоў арганізацый, якія прымаюць студэнцкія атрады, былі ўзнагароджаны памятнымі статуэткамі і каштоўнымі падарункамі за поспехі ў трэцім працоўным семестры.

Павіншаваў рабят з гэтым знамянальным днём намеснік старшыні Віцебскага аблвыканкама Вячаслаў Дурноў.

— З кожным годам у моладзі расце цікавасць да студатрадаўскага руху, які не толькі спрыяе згуртаванню рабят, але і з'яўляецца неад'емнай дапамогай для дзяржавы, бо байцы студэнцкіх атрадаў атрымліваюць каштоўныя навыкі ў сферах сельскай гаспадаркі, медыцыны, педагогікі і не толькі. Рабяты вучацца працаваць у камандзе і браць на сябе адказнасць, што, безумоўна, спатрэбіцца ім у будучыні. А для многіх гэта становіцца сапраўднай школай жыцця, якая вызначае далейшы прафесійны шлях, – адзначыў Вячаслаў Дурноў.

Прыемным сюрпрызам для рабят стала віншаванне ад ветэрана студатрадаўскага руху Барыса Рыкліна, які адзначыў, што традыцыі, закладзеныя ў 60-я гады моладдзю таго часу, знаходзяцца ў надзейных руках маладога пакалення 21 стагоддзя.

Першы сакратар абласнога камітэта ГА «БРСМ» Жанна Нарыцына распавяла пра поспехі студэнцкіх атрадаў вобласці.

— Баяцы студэнцкіх атрадаў – самыя дысцыплінаваныя, выхаваныя, актыўныя і крэатыўныя хлопцы. Яны гатовыя дапамагаць кожнаму, не прывыклі сядзець на месцы без працы. Гэта пацвярджае вялікая колькасць перамог у конкурсах рэспубліканскага ўзроўню. Так, наш атрад атрымаў перамогу на Усебеларускай моладзевай будоўлі, у рэспубліканскім праекце МАЗ «Аўтазаводзец». Сваімі дасягненнямі хлопцы падавалі прыклад моладзі, спрыяючы фарміраванню новага пакалення адказных і мэтанакіраваных грамадзян, гатовых да вырашэння самых складаных задач і ўнясення значнага ўкладу ў развіццё краіны. Іх энтузіязм і імкненне да дасканаласці служаць натхненнем для многіх, даказваючы, што маладосць – гэта сіла, здольная пераўтвараць свет да лепшага, – падзялілася Жанна Нарыцына.

У лік узнагароджаных увайшоў вытворчы студэнцкі атрад «Беркут» імя героя Савецкага Саюза генерал-лейтэнанта Георгія Баталава, якому сёлета споўнілася 5 гадоў. Камісар атрада Іван Странчанка распавёў пра дзейнасць «Беркута».

— У наш атрад можа трапіць любы актыўны і творчы студэнт Віцебскага дзяржаўнага тэхналагічнага ўніверсітэта, галоўнае – жаданне і імкненне. Прыемна, што наша дзейнасць прыносіць карысць дзяржаве. Мы сталі пераможцамі рэспубліканскага праекта МАЗ «Аўтазаводзец». Гэты поспех натхніў нас на новыя здзяйсненні. Кожны член атрада – гэта ўнікальная асоба, чые ідэі і энергія дапамагаюць рухацца наперад, пераадольваючы любыя перашкоды, – сказаў Іван Странчанка.

Удзельнікі студэнцкага педагагічнага атрада «Феникс» імя героя Савецкага Саюза Аляксандра Азончыка кожны год працуюць ва Усерасійскім дзіцячым цэнтры «Арляня» Краснадарскага краю, дзе пераймаюць вопыт арганізацыі дзіцячага адпачынку ў сваіх расійскіх калег, абменьваюцца методыкмі выхаваўчай працы і ўмацоўваюць сяброўскія сувязі паміж моладдзю розных краін.

— Ужо пяты год нашы студэнты дзеляцца сваімі ведамі і талентамі з дзецьмі. Гэта не проста летняя падпрацоўка, а сапраўдная школа жыцця. Магчымасць супрацоўнічаць з рабятамі з іншых краін, пазнаваць іх культуру і традыцыі, робіць гэты досвед сапраўды неацэнным. Мы верым, што такія сумесныя праекты – гэта трывалы фундамент для міру і ўзаемаразумення будучых пакаленняў, – распавяла камандзір атрада ВДУ імя П. Машэрава Яна Мароз.

vitebsk-region.gov.by