На базе Віцебскага дзяржаўнага тэхналагічнага ўніверсітэта адкрылася выстава дэкаратыўна-прыкладнай і тэхнічнай творчасці навучэнцаў і работнікаў устаноў сярэдняй спецыяльнай адукацыі і дадатковай адукацыі дзяцей і моладзі. У яе рамках праходзіць рэгіянальны этап рэспубліканскага агляду інавацыйнай і тэхнічнай творчасці.

- Гэта, напэўна, лепшае прафарыентацыйнае мерапрыемства, - адзначыў намеснік старшыні аблвыканкама Вячаслаў Дурноў. - Тут ёсць магчымасць дэталёва разгледзець арт-аб'екты, якія ствараюць сваімі рукамі і педагогі, і навучэнцы. Экспанаты выставы вырабляюць вялікае ўражанне. У нас створана выдатная база для тэхнічнай творчасці і ёсць выкладчыкі, якія дзеляцца з навучэнцамі сваім энтузіязмам.

Загадчыца асноўнага аддзела метадычнага суправаджэння Віцебскага абласнога цэнтра развіцця прафесійнай адукацыі Алена Шышкіна паведаміла, што такая выстава праходзіць у Віцебску ўжо больш за тры дзесяцігоддзі. Прычым наша вобласць неаднаразова станавілася лідарам па колькасці дыпломаў на рэспубліканскім этапе.

Сёлета на выставе прадстаўлена 1000 экспанатаў, створаных у розных жанрах і тэхніках. У многіх працах прасочваюцца тэмы Года добраўпарадкавання і 80-годдзя Перамогі. Адну з самых яркіх і маштабных экспазіцый падрыхтавалі ў Віцебскім дзяржаўным каледжы лёгкай прамысловасці і тэхналогій.

- Экспанаты стваралі навучэнцы выпускных курсаў пад кіраўніцтвам педагогаў, — расказала «ВВ» дырэктар вучэбнай установы Алена Кучынская. — Некаторыя з іх — гэта дыпломныя працы выпускнікоў. Наш каледж рыхтуе мадэльераў-канструктараў. Падрыхтоўка да выставы дапамагае навучэнцам стаць больш высокакваліфікаванымі спецыялістамі.

Як падкрэсліў начальнік галоўнага ўпраўлення па адукацыі аблвыканкама Дзмітрый Хома, выстаўку рэгулярна будуць наведваць групы старшакласнікаў. Для іх падрыхтавана экскурсійная праграма.

vitebsk-region.gov.by