У Віцебску адбылася восьмая пазачарговая сесія абласнога Савета дэпутатаў

– Цяпер завяршаюцца ўборачныя работы, ідзе пасяўная кампанія, і для паспяховага іх правядзення неабходна прыняць шэраг карэкціровак у бюджэт, – адзначыў старшыня абласнога Савета дэпутатаў Дзмітрый Дзямідаў, адкрываючы пасяджэнне.

Дэпутаты прынялі рашэнне накіраваць дадатковыя рэсурсы камітэту па сельскай гаспадарцы і харчаванні аблвыканкама для выканання меліяратыўных работ па аднаўленні меліяраваных земляў у суме 3 млн рублёў, на субсідаванне бягучай дзейнасці сельгасвытворцаў і набыццё паліўна-змазачных матэрыялаў – 5 млн рублёў, такую ж суму – для набыцця паліва. Частка сродкаў будзе накіравана на аплату комплексу работ па вапнаванні кіслых глеб.

Дзякуючы карэкціроўкам плануецца выканаць і мэтавыя паказчыкі рэгіянальнага комплексу мерапрыемстваў па рэалізацыі Дзяржаўнай праграмы «Аграрны бізнес» на 2021 – 2025 гады, паспяхова завяршыць уборачную і пасяўную кампаніі.

 Будуць знойдзены таксама сродкі для матэрыяльнай падтрымкі грамадзян у перыяд пошуку работы і на арганізацыю часовай занятасці каля 500 непаўналетніх у вольны ад вучобы час.

На нечарговай сесіі абмеркавалі вынікі папярэдняга разгляду праектаў грамадзянскіх ініцыятыў, нацэленых на паляпшэнне жыцця ў малых гарадах і паселішчах. Дэпутаты прагаласавалі за накіраванне сацыяльна значных праектаў у Віцебскую абласную асацыяцыю мясцовых Саветаў дэпутатаў для правядзення іх адкрытага конкурснага адбору.

– Тэма рэалізацыі грамадзянскіх ініцыятыў дастаткова надзённая, – адзначыў кіраўнік абласнога дэпутацкага корпуса. – Неабходна прыкласці максімум намаганняў для таго, каб запланаванае мы зрабілі да канца года. Гэта трэба людзям. І ўжо сёння варта вылучаць новыя ідэі для ўдасканалення жыцця насельніцтва, каб у 2025 годзе актыўна працягнуць гэту карысную работу.

Даведка «ВВ»

На 2024 год прадугледжана каля 30 тысяч рублёў на фінансаванне грамадзянскіх ініцыятыў ад усіх рэгіёнаў Віцебскай вобласці. З 23 праектаў 17 могуць быць рэалізаваны сёлета.