Падчас расследавання крымінальнай справы аб генацыдзе насельніцтва Беларусі ў гады Вялікай Айчыннай вайны 1941 – 1945 гг. пракуратурай Бешанковіцкага раёна па паступіўшым звароце вывучаны абставіны знішчэння мірных жыхароў в.Астроўна

Падчас расследавання крымінальнай справы аб генацыдзе насельніцтва Беларусі ў гады Вялікай Айчыннай вайны 1941 – 1945 гг. пракуратурай раёна па паступіўшым звароце вывучаны абставіны знішчэння мірных жыхароў в.Астроўна, у прыватнасці праведзены неабходныя следчыя дзеянні: дапытаны ў якасці сведкі заяўнік, праведзена выманне і агляд «чарнавіка пісьма» (маці заяўніка), накіраваны запыт у ДУА «Бешанковіцкі раённы гісторыка-краязнаўчы музей» (з мэтай устанаўлення наяўнасці архіўных дакументаў і іншай інфармацыі), па паступіўшым адказе праведзены агляд камп'ютарнай інфармацыі.

Устаноўленыя пракуратурай раёна абставіны сведчаць аб тым, што ў адносінах да мясцовых жыхароў тэрор пачаўся практычна з першых жа дзён акупацыі вёскі.

Так, на сценах дамоў, на слупах былі развешаны загады, якія паведамлялі, што яўрэі в.Астроўна абавязаны пакінуць свае дамы і перасяліцца ў гета. Для яго выдзелілі некалькі дамоў у названым населеным пункце. Пры гэтым выдзеленыя дамы не былі разлічаны на такую колькасць людзей. Каля гэтых дамоў паставілі ахову з ліку паліцаяў. Як сведчаць наступныя падзеі, яўрэяў падманулі, ім сказалі, што іх збіраюць разам, каб кудысьці перасяліць, адправіць на працы.

У верасні 1941 года (меркавана напярэдадні яўрэйскага Новага года – свята Рош-а-Шаны) адбыліся страшныя падзеі, усіх яўрэяў з гета сабралі паблізу магазіна, падагналі машыны, адкрылі барты і сталі заганяць іх у кузаў. У раёне яўрэйскіх могілак в.Астроўна з імі распраўляліся – расстрэльвалі. Мясцовыя жыхары чулі жаночыя і дзіцячыя крыкі. Пасля расстрэлу ў месцы знішчэння «хадзіла зямля».

Не ўсе мясцовыя жыхары паставіліся абыякава да знішчэння сваіх землякоў, аказвалі ім дапамогу (хавалі), у прыватнасці дапамогу ў выратаванні дзяўчынкі-яўрэйкі аказала сваячка сведкі – Сямашка Матрона Іванаўна.

Сёння ў месцы знішчэння мірных жыхароў стаіць помнік, пры гэтым само месца прызнана пахаваннем ахвяры вайны, якому прысвоены №5763.

Праца па расследаванні крымінальнай справы працягваецца.

На фота сваячка сведкі - Сямашка Матрона Іванаўна, прадастаўленае з сямейнага архіва.

Памочнік пракурора

Бешанковіцкага раёна

юрыст 2 класа С.А.Кір'янаў