За калючым дротам: Памяць аб ахвярах і героях вызвалення
Падчас акупацыі на тэрыторыі Беларусі фашысты арганізавалі больш за 260 лагераў ваеннапалонных і 350 лагераў, турмаў, іншых месцаў прымусовага ўтрымання грамадзянскага насельніцтва.
Месцы прымусовага ўтрымання грамадзянскага насельніцтва нямецка-фашысцкімі захопнікамі былі створаны і на тэрыторыі Бешанковіцкага раёна. Так, каля вёскі Бортнікі дзейнічаў лагер для яўрэйскага насельніцтва, у якім утрымлівалася 350-365 чалавек. У кастрычніку 1942 года ўсе вязні былі расстраляны. У 1944-м у гарадскім пасёлку Бешанковічы існавала турма, дзе фашысты ўтрымлівалі мірнае насельніцтва…
На жаль, аднавіць пайменны спіс тых, хто загінуў у засценках турмы, хто развітаўся з жыццём у лагеры, практычна немагчыма. Як немагчыма нанесці на таблічку прозвішчы і імёны тых 50 невядомых ахвяр вайны, пахаваных у брацкай магіле пад №1597, размешчанай на вул. Мічурына ў Бешанковічах, дзе штогод 11 красавіка, у Міжнародны дзень вызвалення вязняў фашысцкіх канцлагераў, праходзіць мітынг-рэквіем.
«Гэта яшчэ адна нагода задумацца над тым, як важна зберагчы памяць аб тых, хто загінуў у гады ваеннага ліхалецця, перадаць гэтую памяць нашчадкам і ўпісаць яе ў генетычны код наступных пакаленняў», – адзначыў памочнік пракурора Бешанковіцкага раёна Ягор Чудакоў.
Па заканчэнні мітынгу хвілінай маўчання ўдзельнікі мітынгу ўшанавалі памяць загінулых і ўсклалі кветкі.
Памочнік пракурора
Бешанковіцкага раёна
юрыст 2 класа Я.Р.Чудакоў