Канцэрты Бешанковіцкай дзіцячай школы мастацтваў - гэта заўсёды яркае і відовішчнае мерапрыемства. Сваё майстэрства прадэманстравалі музыканты, вакалісты, харэографы. Канцэртныя нумары ў выкананні юных талентаў уражваюць сваёй разнастайнасцю. І ўсё дзякуючы педагогам. Бо нездарма кажуць: «Без працы не выйдзеш на сцэну ніколі!».

Інструментальная разнастайнасць дзіцячай школы мастацтваў уражвае. Дзеці цудоўна валодаюць домрай, цымбаламі, гітарай, таленавіта іграюць на акардэоне і іншых музычных інструментах. Пацвярджэннем гэтаму - выступ квартэта гітарыстаў, у складзе якога былі Н.Васілевіч, Д.Цішкевіч, А.Рошчын пад кіраўніцтвам А.Казлова. Некалькі прыемных хвілін гасцям канцэрта падарыў ансамбль дамрыстаў - В.Сакалова, К.Купрацэвіч, А.Рошчын разам з педагогам Г.Семяніда. Майстэрскім выкананнем «Эцюда» праграму працягнуў Н.Сівец. Вельмі інтэнсіўна сустракалі А.Садоўскую, дуэт віяланчэлістаў - Т.Красікаву і Н.Кузьмініч, а таксама Ю. Рагеля і А. Казлова, ансамбль народных інструментаў (А.Ядрэўская, Г.Бурнэйка, Ю.Рагель і А.Казлоў). Запальныя рытмы барабанаў прадэманстравалі Г.Бурнэйка і А.Купрыяновіч. Авацыі залы былі адрасаваныя ансамблю лажкароў «Гарэзы».

Які кірунак ні вазьмі, вучні школы мастацтваў здольныя здзіўляць і захапляць майстэрствам выканання. Да прыкладу, прыхільнікаў сваімі песнямі парадавалі А.Інчына, С. Аўчыннікава і Д.Краўцова. Яркім упрыгожваннем канцэрту сталі харэаграфічныя пастаноўкі А.Пяткевіч і В.Жукавай.

Яркія касцюмы, прыемная музыка, цудоўныя дзіцячыя галасы, прамяністыя ўсмешкі - усё стварыла адмысловую атмасферу прыгажосці і натхнення. Тыя, хто прысутнічаў на гэтым яркім свяце, сутыкнуліся з дзіўным светам музыкі, акунуліся ў выдатны і непаўторны свет дзяцінства. І ў гэтым вялікая заслуга вядучай і аўтара сцэнарыя Т.Голубевай. Вясёлы і казачны відэашэраг мерапрыемства - справа рук Г. Бурнэйка.

"Зара"