На Бешанковіччыне засталіся сляды разгуляўшайся стыхіі

Моцныя дажджы, навальніцы і парывісты вецер прынёс у Беларусь цыклон Xaver, пра які папярэджваў Белгідраметэацэнтр. У ноч з 8 на 9 жніўня стыхія разгулялася і ў Бешанковіцкім раёне.

Моцныя дажджы не прынеслі істотных разбурэнняў, і пацярпелых ад стыхіі, як паведамілі ў РАНС, няма. Аднак парывы ветру былі такой моцы, што ламаліся дрэвы: на вуліцах Камуністычнай і Інтэрнацыянальнай, Віцебскім шашы і ў цэнтральным парку. Разгуляўся вецер і ў дварах жыхароў Бешанковічаў, выносячы з сабой рознага роду канструкцыі і збудаванні. Пацярпеў таксама аб'ект грамадскага харчавання «Кавярня». І гэта ўсё толькі ў райцэнтры.

Наступствы залевы і ветру супрацоўнікі РАНС пачалі ўстараняць адразу. У ноч з чацвярга на пятніцу ў іх было некалькі начных выездаў у раён Астроўна і Пяцігорска, дзе паваленыя дрэвы перакрылі праезную частку, а раніцай сігналы аб паваленых дрэвах паступілі з Рубяжа.

Ударна папрацаваць прыйшлося не толькі супрацоўнікам РАНС і камунальнікам, але і працаўнікам Бешанковіцкага РЭС. У шэрагу населеных пунктаў паўсталі сур'ёзныя праблемы з электразабеспячэннем. Абрывы правадоў і паломкі апор з-за падзення дрэў адбыліся на лініі напружаннем 10 кВ ад падстанцыі ў Улле і да Сокарава, на лініі 0,4 кВ - у населеных пунктах Заручэўе, Двор Нізгалава, Бачэйкава, Піліпенкі, Кошчава, Стрыжава, Лабачова, Чанавічы , Паўазер'е і Бешанковічы. У службу паступіла 57 заявак. Спецыялісты РЭСа ліквідавалі наступствы стыхіі на працягу 1,5 сутак. Працавала 6 брыгад (24 чалавекі), былі задзейнічаныя 6 аўтамашын і 2 механізмы.

Што яшчэ чакаць ад надвор'я? Зразумела адно: пакуль службам расслабляцца не варта.

"Зара"