Першыя навабранцы з Бешанковіцкага раёна адправіліся да месца службы

Першыя навабранцы з Бешанковіцкага раёна адправіліся да месца службы
У Беларусі пачалася адпраўка грамадзян, прызваных на тэрміновую ваенную службу, службу ў рэзерве, у злучэнні і воінскія часці Узброеных Сіл.

26 кастрычніка з райваенкамата на абласны прызыўны пункт адправіліся і першыя навабранцы з Бешанковіцкага раёна.

Мацвей Герцык з вёскі Двор Нізгалава і Расціслаў Баталка з
Бешанковіч папярэдне ўжо ведалі, што будуць служыць у віцебскай 103-й мабільнай брыгадзе. Настрой у маладых людзей быў бадзёры. Калі і закраўся ў сэрца сум, то толькі ад расстання з роднымі і блізкімі людзьмі.

— Да войска, — расказваў Мацвей, — я скончыў Віцебскі дзяржаўны прафесійна-тэхнічны каледж лёгкай прамысловасці, атрымаў сярэдне-спецыяльную адукацыю, прафесію тэхніка абутковай вытворчасці. Чатыры месяцы адпрацаваў на «Белвесте». Да тэрміновай службы рыхтаваўся, самастойна адвучыўся ў ДТСААФ, атрымаў правы кіроўцы, бо планую застацца ў войску па кантракце.

Расціслаў Баталка далёка пакуль не загадвае. У войска, кажа, пайшоў па абавязку сумлення. Згодна з Канстытуцыяй абарона краіны - гэта святы абавязак грамадзяніна. «Надыйшоў і мой час служыць, атрымаць ваенную спецыяльнасць, — кажа Расціслаў. - Лепш зрабіць гэта цяпер, чым потым». Выпускнік Віцебскага дзяржаўнага тэхнічнага каледжа, ён атрымаў прафесію электразваршчыка, паўгода працаваў на Віцебскім заводзе трактарных запасных частак.

«Армія - важная школа жыцця. Яна гартуе характар, сілу волі, робіць з маладых людзей мужчын, абаронцаў сваёй Радзімы, сям'і. Служба ў ёй заўсёды была сапраўднай мужчынскай справай, — падкрэсліў, даючы запавет на дарогу прызыўнікам, старшыня раённай арганізацыі ГА «Беларускі саюз афіцэраў» П. У. Паўлоўскі. - Любы мужчына абавязкова павінен прайсці гэтую школу. Патрыётамі не нараджаюцца, патрыётамі становяцца. З сённяшняга дня вы таксама ўліліся ў вайсковы строй Узброеных Сіл Рэспублікі Беларусь, сталі абаронцамі Айчыны не на словах, а на справе. Нічога страшнага ў вайсковай службе няма. Рабіце, як загадвае сэрца, па-чэснаму, па справядлівасці, і служба ў войску стане адным з лепшых перыядаў у вашым жыцці, навучыць не толькі патрыятызму, але і дысцыпліне, уменню прымаць рашэнні ў надзвычайных сітуацыях, дасць пасталець, умацаваць сваё здароўе, стаць сапраўднымі мужчынамі. А новыя веды, без сумнення, спатрэбяцца ў будучыні, стануць апорай у далейшым жыцці». Служба ў падраздзяленні Сіл спецыяльных аперацый не лёгкая, але цікавая.

Пётр Уладзіміравіч пажадаў хлопцам, каб яна была яшчэ і спакойнай. Каб праз належны тэрмін сённяшнія навабранцы вярнуліся ў бацькоўскія дамы ўздужалымі і памужнелымі, а іх родным і блізкім - моцнага здароўя і цярпення.

Паводле інфармацыі ваеннага камісара Бешанковіцкага і Шумілінскага раёнаў А. М. Савіча, у сёлетнюю прызыўную кампанію з нашага раёна плануецца адправіць у войскі 16 чалавек, 3 з іх будуць праходзіць службу ў рэзерве. Усяго на ўкамплектаванне Узброеных Сіл, іншых войскаў і воінскіх фарміраванняў Рэспублікі Беларусь у кастрычніку-лістападзе накіруюць каля 10 000 чалавек.

Прызыў грамадзян на тэрміновую ваенную службу ў жніўні-лістападзе 2021 года ажыццяўляецца ў адпаведнасці з Указам Прэзідэнта Рэспублікі Беларусь ад 20 ліпеня 2021 года нумар 277. Выкліку на прызыўныя камісіі восенню бягучага года падлягае каля 60 тысяч маладых людзей. Пачатая адпраўка новага папаўнення ў войскі працягнецца: ва Узброеныя Сілы - па 5 лістапада, іншыя войскі і воінскія фарміраванні - па 30 лістапада 2021 года.

У сувязі з санітарна-эпідэміялагічнай абстаноўкай у краіне на ўсіх зборных пунктах сумесна з органамі аховы здароўя праводзяцца дадатковыя мерапрыемствы, накіраваныя на прадухіленне распаўсюджвання каранавіруснай інфекцыі сярод навабранцаў. Прыбыўшы да месца службы, усё новае папаўненне пройдзе двухтыднёвую ізаляцыю. Прысягу зноў папаўненне ў злучэннях і воінскіх часцях Узброеных Сіл прыме 20 лістапада.

"Зара"