Пра новаўвядзенні выбарчай кампаніі і падрыхтоўку да «Дажынак» з калектывам Бешанковіцкага РГС пагутарыла кіраўнік раёна Галіна Унуковіч

Напярэдадні адзінага дня галасавання на Бешанковіччыне праходзяць сустрэчы кіраўніцтва раёна з працоўнымі калектывамі, закліканыя азнаёміць выбаршчыкаў з навінамі электаральнай кампаніі.
Сёння з калектывам Бешанковіцкага раёна газазабеспячэння сустрэліся старшыня райвыканкама Галіна Унуковіч і начальнік аддзела ідэалагічнай работы і па справах моладзі райвыканкама Святлана Гайко.
Выбарчая кампанія 2024 года праходзіць у новых прававых умовах. Кіраўнік раёна расказала прысутным аб асноўных навацыях выбарчага заканадаўства, прадыктаваных абноўленай Канстытуцыяй і патрабаваннямі сучаснасці, а таксама аб ходзе выбарчай кампаніі на тэрыторыі Бешанковіцкага раёна.
Святлана Гайко звярнула ўвагу членаў працоўнага калектыву на тое, што заканадаўча прынята рашэнне аб забароне на вядзенне на выбарчых участках фота і відэаздымкі. Зрабіць фота можна толькі з дазволу старшыні выбарчай камісіі.
Як заўважыла Галіна Уладзіміраўна, выбары - усенароднае мерапрыемства, якое дазваляе кожнаму з нас праявіць пачуццё салідарнасці з тым ці іншым кандыдатам, выказаць сваю волю і вызначыць асобу, што будзе прадстаўляць нашы інтарэсы ў мясцовых саветах дэпутатаў або Палаце прадстаўнікоў Нацыянальнага сходу Рэспублікі Беларусь.
Улада зробіць усё для таго, каб забяспечыць электаральны суверэнітэт Рэспублікі Беларусь, правесці выбары-2024 спакойна, адкрыта і аб'ектыўна. Задача нас, выбаршчыкаў, праявіць грамадзянскую адказнасць, вызначыцца для сябе, каму з кандыдатаў аддаць перавагу, прыйсці на выбарчы ўчастак і аддаць голас за свайго дэпутата.
Работнікі газавай службы скарысталіся магчымасцю задаць кіраўніку раёна цікавячыя пытанні. Адзін з іх - якая праца вядзецца ў раёне па падрыхтоўцы да абласнога фестывалю-кірмашу «Дажынкі» і ці будзе ў Бешанковічах пабудаваны басейн.
Будаваць будзем, запэўніла Г.В. Унуковіч. Праўда, у сувязі са зменамі ў заканадаўстве праектная дакументацыя пакуль яшчэ ў працы, а гэта значыць, што, магчыма, да «Дажынак» басейн не будзе ўведзены ў эксплуатацыю, але ў нашым райцэнтры ён з'явіцца. Галіна Уладзіміраўна падрабязна расказала прысутным аб ходзе падрыхтоўкі раёна да абласнога фестывалю-кірмашу, аб тым, што плануецца зрабіць у бягучым годзе па рамонце жылфонду, устаноў адукацыі, культуры, у цэнтральнай раённай бальніцы, у Цэнтральным парку Бешанковічаў, прылеглых да яго будынках, якія маюць статус гісторыка-культурных каштоўнасцей, у гарпасёлку ў цэлым, аб планах на перспектыву. Яна адказала на іншыя пытанні, у тым ліку аб уладкаванні фотазоны каля загса.

"Зара"